«Հանրապետություն» կուսակցության նախագահ, Հայ ազգային կոնգրեսի ներկայացուցիչ Արամ Սարգսյանն Ադրբեջանի`ՄԱԿ-ի Անվտանգության խորհրդի ժամանակավոր անդամ ընտրվելու մեջ վտանգ չի տեսնում և չի կարծում, թե նրա ներկայությունն այդ կառույցում որևէ կերպ կվնասի Հայաստանին: Նման տեսակետ քաղաքական գործիչը հայտնեց «Առաջին լրատվական»-ի հետ զրույցում` անդրադառնալով երեկ այդ կառույցի Գլխավոր ասամբլեայում տեղի է ունեցած Անվտանգության խորհրդի ժամանակավոր անդամի ընտրություններին:
«Ադրբեջանը՝ որպես ՄԱԿ-ի ԱԽ ժամանակավոր անդամ, կառույցում միանշանակորեն բարձրաձայնելու է ղարաբաղյան հակամարտության և իր տարածքային ամբողջականության հարցերը` պնդելով, որ Հայաստանն «օկուպացրել է» իր տարածքների 20 տոկոսը և ավելին: Միաժամանակ նրա այս գործողություններում վտանգ չեմ տեսնում, քանի որ ՄԱԿ-ում լավ են հասկանում, որ այդ խնդիրը պետք է լուծվի ԵԱՀԿ Մինսկի խմբի շրջանակներում: ՄԱԿ-ում լավ են գիտակցում, որ լրացուցիչ շրջանակների ներգրավումը ԼՂ հակամարտության հարցի լուծման մեջ ավելի վնաս է խնդրի լուծմանը, քան օգուտ»,- նկատեց ՀԱԿ նեկայացուցիչը:
Արամ Սարգսյանի համոզմամբ՝ Հայաստանը վատ արտաքին քաղաքականություն է իրականացնում ինչպես ՄԱԿ-ում, այնպես էլ առհասարակ` գլոբալ իմաստով:
Հիշեցնենք, որ երեկ` հոկտեմբերի 24-ին, ՄԱԿ-ի Գլխավոր ասամբլեայում տեղի է ունեցել Արևելյան Եվրոպան ներկայացնող երկրների՝ ՄԱԿ-ի Անվտանգության խորհրդի ժամանակավոր անդամի ընտրությունները։ Իր պատմության մեջ առաջին անգամ ՄԱԿ ԱԽ-ի ժամանակավոր անդամ է ընտրվել Ադրբեջանը։
Սլովենիան հանել է իր թեկնածությունը, իսկ Ադրբեջանի օգտին քվեարկել է 155 երկիր, 24 երկիր էլ ձեռնպահ է մնացել։
Ադրբեջանը ՄԱԿ ԱԽ ժամանակավոր անդամի պարտականությունների կատարմանը ձեռնամուխ կլինի 2012 թվականի հունվարի 1-ից։ Ոչ վաղ անցյալում Ադրբեջանի նախագահի աշխատակազմի հասարակական-քաղաքական հարցերի վարչության պետ Ալի Հասանովը հայտարարել էր, որ, ՄԱԿ ԱԽ մշտական անդամների հետ մեկտեղ, որոշակի կարգավիճակ ունեն նաև նրա ժամանակավոր անդամները:
