Հայաստանում տուգանքի և փոխհատուցման ինստիտուտները խիստ լղոզված են, և օրենսդրությունը պետք է նպաստի խնդրի լուծմանը` տարորոշելու մամուլում եղած վիրավորանքի և զրպարտության ձևակերպումները. նման տեսակետ այսօր կայացած մամուլի ասուլիսի ժամանակ հայտնեց «Առավոտ» օրաթերթի խմբագիր Արամ Աբրահամյանը` միաժամանակ հավելելով, որ սա լուրջ իրավաբանական հարց է:
Ասուլիսին ներկա՝ «Ժամանակ» թերթի խմբագիր Արման Բաբաջանյանն իր հերթին կասկած հայտնեց, որ տուգանքի կամ փոխհատուցման ճանապարհով հնարավոր է մարդու արժանապատվություն վերականգնել: «Մեր կողմից Քոչարյանների ընտանիքին վճարած 3 մլն դրամը կարո՞ղ է վերականգնել նրանց խախտված արժանապատվությունը: Մենք հայտնի հոդվածի առնչությամբ 3 անգամ հերքում ենք տպագրել, բայց դա նրանց չի գոհացրել»,- հիշեցրեց նա` միաժամանակ հավելելով, որ ինքը կողմ է լրատվամիջոցների հանդեպ տուգանքներին, սակայն` բացառապես դրա շեմը հստակեցնելու պարագայում:
Անդրադառնալով լրատվամիջոցների` սեփական աշխատանքի ինքնակարգավորման մեխանիզմներին` ասուլիսի մյուս բանախոսը` «Երկիր» օրաթերթի խմբագիր Բագրատ Եսայանը, նկատեց, որ «ինքնակարգավորումը վատ բան չէ»` քանի դեռ չի վերածվել գրաքննության կամ խիստ սահմանափակումների:
«Ինչպե՞ս ինքնակարգավորել աշխատանքը, ասենք, այն դեպքում, երբ մենք մեր հոդվածում «արյուն» բառը նկատի ենք ունեցել որպես պլազմա, այնինչ դատարանը այդ բառի և Քոչարյանների միջև կապ է տեսել»,- ի հավելում Եսայանի արտահայտած մտքի` տարակուսանք հայտնեց «Ժամանակ» թերթի խմբագիր Արման Բաբաջանյանը:
Ամփոփելով` խմբագիրներն անդրադարձան նաև հայաստանյան տպագիր մամուլի հետագա ճակատագրին:
«Թերթերն ու հեռուստաընկերությունները պետք է վերանայեն լրատվության տարածման իրենց մոտեցումները: 5-6 տարի հետո թերթերը լուրջ խնդիրների առջև են կանգնելու: Ինտերնետային ԶԼՄ-ների առկայության ֆոնին, համոզված եմ, թերթերը կմահանան այն ժամանակ, երբ կմահանա 20-րդ դարում ծնված վերջին մարդը»,- նկատեց «Առավոտ» օրաթերթի խմբագիր Արամ Աբրահամյանը:
«Երկիր»-ի խմբագիրն իր հերթին նկատեց, որ թերթ ընթերցելու մշակույթն աստիճանաբար վերանում է, իսկ լրատվություն ստանալու նախընտրելի ձևը, ի դեմս ինտերնետի՝ փոխվում:
«Ժամանակ» թերթի խմբագիր Արման Բաբաջանյանը, սակայն, չհամաձայնեց նրանց հետ` նկատելով, որ թեպետ խնդիրն առկա է ամբողջ Արևմուտքում, սակայն հեղինակավոր պարբերականները, անգամ ինտերնետային տարբերակներ ունենալու պարագայում, չեն մտածում փակվելու մասին: «Մենք դեռ երկար ճանապարհ ունենք անցնելու: Թերթերին դատարաններով քարշ տվողները թող հույս չունենան, որ սնանկանալու և սպառվելու ենք: Տպագիր մամուլը Հայաստանում դեռ անելիք ունի»:
