««Կատարյալ փոթորկի» հեղինակ Ռուբինին ասում էր, որ այն կլինի 2013 թվականին, բայց ես կարծում եմ, որ դա կլինի ավելի շուտ»,- այսօր լրագրողների հետ հանդիպման ընթացքում հայտարարեց Ամերիաբանկի զարգացման գծով տնօրեն Տիգրան Ջրբաշյանը` պարզաբանելով, որ «կատարյալ փոթորիկը» ԱՄՆ-ի վարկային, ԵՄ-ում պարտքային խնդիրներն են և Չինաստանում տնտեսության աճի դանդաղումը:
Ըստ նրա՝ փոթորկի վտանգն այժմ առավել իրատեսական է, խնդիրները խորացել են, չկան այն նշանները, որ տնտեսական քաղաքականության վրա ազդողները գտել են նոր լուծումներ: Խնդիրների լուծումը բոլոր կողմերը տեսնում են նույն կերպ. ԱՄՆ-ը սովորաբար փորձում է մեղմացնել իրադրությունը, գնում է կարճաժամկետ պարտատոմսեր, որով փող է ներարկում շուկա, և հիմա բոլորը կրկին դրան են սպասում: ԵՄ-ն չի կարողանում ադեկվատ լուծում գտնել և, Տ.Ջրբաշյանի կարծիքով, Հունաստանի դեֆոլտին այս պահին այլընտրանք չկա, և եթե անգամ ԵՄ երկրները շարունակեն ֆինանսավորել պետական պարտքը, այնուամենայնիվ, չի կարող Հունաստանը միանգամից բոլոր աշխատավարձերը կրկնակի նվազեցնել և այս կամ այն կերպ տեխնիկական դեֆոլտից չի խուսափի, իսկ դրան կհետևի Պորտուգալիան: Չինաստանի քաղաքականությունն ուղղված է ներքին սպառման խթանմանը` արտահանման փոխարեն, և արդյունքում ներքին ինֆլյացիան մեծացել է:
«Իրականում ճգնաժամը հնարավորություն է, այն մաքրում է տնտեսությունը և առաջ մղում: Այս երկրորդ ճգնաժամի պատճառն այդ պարզ ճշմարտությունը չընկալելն է: Առաջին փուլից հետո տեղ գտած լուծումները սխալ էին»,- ասաց Տ. Ջրբաշյանը` կրկին շեշտելով, որ կատարյալ փոթորիկն անխուսափելի է:
Տ. Ջրբաշյանի գնահատականով՝ Հայաստանի վրա դրա ազդեցությունը շատ վատ կլինի. «Առաջինից հետո վերանայվեցին նախապատվությունները, շինարարության տեսակարար կշիռը նվազեց, մեծացավ արդյունաբերությանը, բայց բացասական էր հանքահումքային մասի ավելացումը»:
Նրա խոսքով՝ երկիրը փոխվել է 2007-ի համեմատ, բայց ոչ այնքան, որ ճգնաժամի մյուս փուլը չի ազդի կամ պակաս կազդի:
Անդրադառնալով Doing business 2012-ի ցուցանիշներին, որոնցով ՀՀ-ն իր դիքերը բարելավել է 6 տեղով, Տ. Ջրբաշյանը նշեց, որ նման վարկանիշներն ընդամենը «պրոկսի» են և չեն արտահայտում տնտեսության իրական վիճակը: Օրինակ՝ «Լեմոն ընդ բրադերս» բանկին վարկանշային կազմակերպությունները դրա սնանկացումից 2 ամիս առաջ ամենաբարձր A դասի գնահատական էին տալիս: Ըստ տնտեսագետի՝ հարկավոր է ոչ թե ուշադրություն դարձնել գործակիցներին, այլ պետք է իրական տնտեսությունում բարեփոխումներ կատարել, բարելավել գործարար միջավայրը, իսկ վարկանշային ընկերությունները, որպես դրա հետևանք, կգնահատեն այդ:
Պատասխանելով «Առաջին լրատվական»-ի հարցին, թե ներդրումների պաշտպանվածության մասով ՀՀ-ն հետընթաց էր գրանցել, ինչպե՞ս եք գնահատում ՀՀ-ում ներդրումների պաշտպանվածությունն իրականում, Տ. Ջրբաշյանը նշեց, որ Հայաստանը դեռ բարեփոխումներ չի իրականացրել այդ ոլորտում, որպեսզի գրավի արժանի տեղ այլ երկրների շարքում:
