Թուրքական Ihlas լրատվական գործակալության փոխանցմամբ՝ ԱՄՆ նախագահ Բարաք Օբաման իր ցավակցությունն է հայտնել Թուրքիայի հարավարևելյան հատվածում ընկած Հաքքարի նահանգի Չուքուրջա շրջանում գրանցված թուրք-քրդական բախման ժամանակ զոհված ավելի քան 20 թուրք զինծառայողների հարազատներին։
Օբաման դատապարտել է քուրդ զինյալների այդ հարձակումը՝ ընդգծելով, որ ԱՄՆ-ը սերտորեն համագործակցելու է Թուրքիայի հետ՝ Քրդստանի աշխատավորական կուսակցության (PKK) գործունեության չեզոքացման գործում.
«Վաշինգտոնը շարունակում է համագործակցել Թուրքիայի կառավարության հետ, որը ձգտում է չեզոքացնել PKK-ի ահաբեկչական սպառնալիքը և երկրի հարավարևելյան հատվածում ապահովել կայունություն։ Մյուս ժողովուրդների նման, թուրք ժողովուրդը նույնպես արժանի է անվտանգ ու խաղաղ կյանքի։ Ի դեմս ԱՄՆ-ի՝ Թուրքիան այդ ճանապարհին մշտապես կունենա ընկեր ու դաշնակից»։
Նշվում է, որ PKK-ի հարձակումը դատապարտել են նաև Մեծ Բրիտանիայի վարչապետ Դևիդ Քեմերոնը, Գերմանիայի արտգործնախարար Գիդո Վեստերվելեն, ԵՄ-ի արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնը, Թուրքիայում Իրանի դեսպանը և ուրիշներ։