«2008 թվականի ֆինանսական ճգնաժամը լուրջ ազդեցություն է ունեցել հայաստանյան տնտեսության վրա, և ճգնաժամի երկրորդ ալիքի դեպքում Հայաստանի դրությունը բավական բարդ կլինի»,- այսօր տեղի ունեցած մամուլի ասուլիսի ժամանակ ասաց տնտեսական գիտությունների թեկնածու Գրիգոր Հայրապետյանը:
Նրա խոսքով՝ վերջին մեկ ամսվա ընթացքում ֆինանսական ճգնաժամի երկրորդ ալիքի մասին խոսակցությունները հաճախակիացել են և դրան սպասելու պատճառներից մեկն ավելացող պետական պարտքեր ունեցող Ամերիկան է, մյուսը՝ Եվրոպան: Միաժամանակ՝ մասնագետը տեղեկացրեց, որ միջազգային ոչ մի հեղինակավոր կազմակերպություն չի կանխատեսել, թե երբ կարող է տեղի ունենալ ճգնաժամի երկրորդ ալիքը, որը, ըստ նրա՝ գուցե ավելի հզոր լինի, քան առաջինը:
«Ի տարբերություն ճգնաժամի առաջին ալիքի, որը սկիզբ էր առել ԱՄՆ-ից, և որի ժամանակ Եվրոպան համեմետաբար լավ դիրքերում էր, այս մեկը կարող է ավելի հզոր լինել, քանի որ այժմ թույլ Միացյալ Նահանգներից բացի, մենք ունենք նաև թույլ Եվրոպա: Այստեղից է, որ երկրորդ ալիքի` առավել ուժեղ լինելու հավանականությունը մեծանում է»,- նկատեց տնտեսագետը` ավելացնելով, որ ճգնաժամի ալիքի կրկնության դեպքում գործազրկության մակարդակը կաճի, հետևաբար կավելանա նաև սոցիալական լարվածությունը:
Ամփոփելով` Հայրապետյանը չբացառեց, որ Հայաստանում տնտեսական իրավիճակի վատթարացումը կարող է հանգեցնել սոցիալական լարվածության: «Շատ գործարարներ, հնարավոր է, իրենց բիզնեսը տեղափոխեն արտերկիր, մարդիկ բողոքեն ստեղծված իրավիճակից: Բարդագույն հետևանքներից խուսափելու համար Հայաստանը պետք է ունենա զարգացած կամ զարգացող տնտեսություն»,- ասաց նա:
Վերջում տնտեսագետը հիշեցրեց, որ 2010 թվականի տվյալներով՝ Հայաստանի պետական պարտքը ՀՆԱ-ի նկատմամբ 35 տոկոս է, ինչն այնքան էլ վտանգավոր չէ:
