Ամերիկացիների մեծ մասը պաշտպանում է արդեն ամբողջ աշխարհում ընթացքող «Գրավեք Ուոլ Սթրիթը» ակցիան: Այս մասին են վկայում USA Today թերթի և Gallup կենտրոնի անցկացրած հարցման արդյունքները:
Հարցվածների 78%-ը համոզված է, որ Ուոլ Սթրիթի ներկայացուցիչները ամբողջությամբ կամ հիմնականում մեղավոր են ստեղծված տնտեսական դրության համար: 87%-ը կարծում է, որ սխալներ է թույլ տվել նաև դաշնային կառավարությունը: Այն հարցին, թե ով է ավելի շատ մեղավոր տնտեսական ճգնաժամի համար` խոշոր բիզնե՞սը, թե՞ կառավարությունը, 30%-ը պատասխանել է` Ուոլ Սթրիթը, 64%-ը մեղավոր է համարում ԱՄՆ վարչակազմին:
Ինչպես գրում է РИА “Новости-ն, հարցումը ցույց է տվել, որ դրան մասնակցած ամերիկացիների 10-ից 6-ը ընդհանուր առմամբ պաշտպանում է «Գրավեք Ուոլ Սթրիթը» շարժումը: Սակայն շատերը նաև պատասխանել են, որ ոչինչ չգիտեն ակցիայի մասին, ուստի չեն կարող որևէ գնահատական տալ:
Հետազոտությանը մասնակցած ամերիկացիների մոտ մեկ քառորդը հայտարարել է, որ իրենց համարում են շարժման համախոհներ, 19%-ը նշել է, որ դեմ է շարժմանը:
Հարցումն անցկացվել է հանգստյան օրերին 18 տարեկանից բարձր 1026 քաղաքացիների շրջանում:
«Գրավեք Ուոլ Սթրիթը» ակցիան սկսվել է Նյու Յորքում սեպտեմբերի 17-ին և տարածվել ԱՄՆ խոշոր քաղաքներում, վերջին օրերին՝ նաև Եվրոպայում: Ցուցարարները հանդես են գալիս գործազրկության, իշխանությունների քաղաքականության, ֆինանսական ինստիտուտների գործողությունների դեմ: