Հոկտեմբերի 14-ին Ստեփանակերտում տեղի է ունեցել հեռուստալրագրող Վարդգես Բաղյանի «Տեսադաշտ 1988-1994թթ.» փաստագրական գրքի շնորհանդեսը: Այս մասին «Առաջին լրատվականի» հետ զրույցում տեղեկացրեց գրքի հեղինակը` ընդգծելով, որ նկարագրված դեպքերը ներառում են 1988թ. փետրվարի խաղաղ ցույցերից մինչև զինադադարն ընկած տարիները` 1994թ. մայիսը:
«Որպես ականատես` ձեռքիս տակ բավականին ստույգ նյութեր կային, որոնք ցանկացա գիրք դարձնել, որպեսզի ընթերցողի սեղանին այն նաև գրքի տեսքով լինի: Գրքի թեման դա է`Արցախյան շարժում, Ազատամարտ, պետականակերտման գործընթաց ԼՂՀ-ում»,- հավելեց նա` ընդգծելով, որ իհարկե, հնարավոր չի եղել բոլորին ընդգրկել, քանի որ «այդ հերոսական էջերն անհամեմատ շատ են, քան տեղ են գտել գրքում»:
Հեղինակի խոսքով` ինքը փորձել է ազատամարտը ներկայացնել այնպես, ինչպես այն եղել է իրականում:
Հարցին, թե ինչպես է առաջացել գիրք գրելու գաղափարը՝ Վ.Բաղյանը պատասխանեց, որ Արցախի նորաբաց հեռուստատեսությունում աշխատած տարիներին պատրաստել է շուրջ 20-ժամանոց՝ «Թերթելով պատմության էջերը» հեռուստաշարքը, որի տեսագրություններն էլ հիմք ծառայեցին հետագայում գիրք գրելու համար:
«Տարիների ընթացքում մտածեցի` գուցե կա դա գրքի վերածելու անհրաժեշտությունը: Թող մեծամտություն չլինի ասելը, բայց գիրքը թերթելով մարդիկ մոտիկից կարող են իմանալ` ինչ է կատարվել Արցախում, ինչ է ասել այս կամ այն հերոսը: Օրինակ` կարող են թերթել գիրքը ու տեսնել` ինչ է ասել Շուշին գրավելուց առաջ Արկադի Տեր-Թադևոսյանը»,- նշեց վերջինս:
Գրքի նախաբանում հեղինակը համառոտ անդրադարձ է կատարել Արցախը Ադրբեջանին բռնի ուժով բռնակցելուն, նկարագրել`ինչեր են տեղի ունեցել մինչ 1988-ը, ու թե ինչն է պատճառ հանդիսացել ազգային-ազատագրական շարժման համար:
«Տեսադաշտ 1988-1994թթ.»-ը հեղինակի 5-րդ գիրքն է: 1993թ. Վ.Բաղյանը գիրք է գրել Մոնթե Մելքոնյանի` Ավոյի մասին, նրա զոհվելուց հետո, այնուհետև՝ 1998թ. լույս է տեսել «Ֆենոմեն» գիրքը, որին հաջորդել է օպերատոր-ազատամարտիկ Սերգեյ Համբարձումյանի մասին գիրքը ու «Չընդհատվող թռիչքը» հուշապատումը:
