Կովկասի ինստիտուտը Հայաստանում ԱՄՆ դեսպանատան հետ համատեղ այսօր կազմակերպել էր կլոր սեղան` «Ժողովրդավարության անցումը Ռուսաստանում և հետխորհրդային շրջանում» թեմայի շրջանակներում:
Զեկույցով հանդես եկավ Կալիֆոռնիա-Բերկլի համալսարանի պրոֆեսոր, դոկտոր Սթիվեն Ֆիշը, ով ուսումնասիրում է ժողովրդավարության և իշխանության փոփոխությունը զարգացող և հետխորհրդային երկրներում: Նա կարևորեց Ռուսաստանի ժողովրդավարացման հարցը:
«Ինձ համար ժողովրդավարացման ձախողումը ամենակարևոր հարցն է: Ռուսաստանը շատ ծանր վիճակում էր, բայց լավ նախադրյալներ ուներ ժողովրդավարացման համար, բայց դա ձախողվեց: Ինչու ձախողվեց ժողովրդավարացումը ՌԴ-ում… Անկախ նրանից, որ այստեղ կարևոր է անհատականության դերը, կան երեք գործոններ: Առաջին հերթին ՌԴ-ն շատ նավթ ունի: Աշխարհում չկա երկիր, որ նավթ է արտահանում և շարունակում է ժողովրդավարական արժեքներին հավատարիմ մնալ: Թեև ՌԴ նավթն այնքան չէ, որ քաղաքացուն Քուվեյթի բնակչի նման «գնեն»:
1990-ականներին ժողովրդավարացումը ՌԴ-ում առաջացրեց թալան: Տնտեսական ազատականացման տակ ՌԴ-ում մենք պետականացում ենք տեսնում»,- նշեց Սթիվեն Ֆիշը՝ հավելելով, որ ՌԴ Սահմանադրությունը աղետ է: Ժողովրդավարացման ձախողման համար նա գործոն համարեց նաև մշակութային գործոնը, պատմական դեսպոտիզմը: