Մինչ ռուսները փորձում են պարզել, արդյոք «ստորացրել են» իրենց չինացիները Վլադիմիր Պուտինի` Չինաստան կատարած այցի ժամանակ, Եվրոպայում անհանգստացած են Ռուսաստանի և Ասիայի մերձեցումից: Կասկածելով, որ Ռուսաստանի վարչապետը փորձում է դուրս մղել եվրոպացիներին Չինաստանից, նրանք զգուշանում են, որ այժմ ՌԴ-ն իր չինացի ընկերների միջոցով կարող է վերջնականապես վնասազերծել ՄԱԿ-ի ԱԽ-ում իր հակառակորդներին:
Ինչպես գրում է իսպանական La Vanguardia թերթը, Ռուսաստանի վարչապետն իր այցով փորձում էր ցույց տալ ՌԴ աշխարհաքաղաքական նկրտումների ուղղությունը: Պարբերականը թվարկում է այն բոլոր պատճառները, որոնցից ելնելով ՌԴ ապագա նախագահը 180 աստիճանով փոխելու է երկրի քաղաքականությունը:
Նախ, Չինաստանը Ռուսաստանի առաջատար առևտրական գործընկերն է: Բացի այդ, Չինաստանն առևտրական առումով ավելի գրավիչ է, քան ծանր ֆինանսատնտեսական ճգնաժամի մեջ գտնվող ԱՄՆ-ը կամ Եվրոպան: Թերթը գրում է, որ ամբողջ ուժով զարգացող երկրները պետք են միմյանց: Չինաստանը պետք է Ռուսաստանին ոչ միայն էներգետիկայի համար: Կրեմլը գիտի, որ չինական ներդրումները Սիբիրի և ռուսական Հեռավոր Արևելքի զարգացման միակ հնարավոր շարժիչ ուժն են:
Սակայն ռուս-չինական հարաբերություններում ամեն ինչ այդքան հարթ չէ: Ավանդական սահմանային վեճերին և աշխարհառազմավարական մրցակցությանը գումարվում է Միջին Արևելքի երկրներում սեփական ազդեցությունը տարածելու համար պայքարը: Այս հարցում Պեկինը վերջին տարիների ընթացքում զգալիորեն առաջ է գնացել, ինչը Մոսկվային ստիպում է վերականգնել այրված կամուրջները, մեջբերում է La Vanguardia-ն:
