ԱՄՆ պետքարտուղար Հիլարի Քլինթոնը հայտարարել է, որ խորհուրդ է տալիս նախագահ Բարաք Օբամային վետո դնել ՄԱԿ-ի ֆինանսավորման մեջ Վաշինգտոնի մասնակցությունը սահմանափակող բանաձևի վրա: Ինչպես հաղորդում է Associated Press-ը, Կոնգրեսին ուղղված իր նամակում Քլինթոնը բացատրել է, որ բանաձևը արգելք կհանդիսանա ազգային անվտանգության համար և կբարդացնի միջազգային անվտանգության, ահաբեկչության դեմ պայքարի և զանգվածային բնաջնջման զենքի դեմ պայքարի բնագավառներում ԱՄՆ համագործակցությունն այլ երկրների հետ:
Օրինագիծը, որում պահանջվում է ՄԱԿ-ի ֆինանսավորումը դարձնել կամավոր, Կոնգրեսի Ներկայացուցիչների պալատը կքննարկի հոկտեմբերի 13-ին:
Քլինթոնը նշել է, որ լիովին հասկանում է օրենսդիրների մտահոգությունները, սակայն միջազգային հանրության հետ ուղղակի բախումը ԱՄՆ-ին օգուտ չի բերի:
Ավելի վաղ հաղորդվում էր, որ Կոնգրեսի մի շարք ներկայացուցիչներ, անհանգստացած Պաղեստինի ճանաչման բացասական հետևանքներից, պահանջել են Օբամայից ճնշում գործադրել ՄԱԿ-ի վրա` այդպիսի որոշումը կանխելու համար:
ԱՄՆ նախագահը հայտարարել է, որ ԱԽ-ն վետո կդնի Պաղեստինյան ինքնավարության կարգավիճակը բարձրացնող ցանկացած բանաձևի վրա: Սակայն Գլխավոր ասամբլեայում և ՄԱԿ-ի այլ կառույցներում, որտեղ ԱՄՆ-ը վետոյի իրավունք չունի, Պաղեստինի ճանաչումն արգելափակել հնարավոր չէ:
