ՆԱՏՕ-ի երկրների ղեկավարերն Անկարայում հուլիսի 7-8-ը տեղի ունեցած գագաթնաժողովի արդյունքներով համատեղ հռչակագիր են հրապարակել, որում անդրադարձ կա դաշինքի պաշտպանությանը, Ռուսաստանի ներկայացրած սպառնալիքին, Ուկրաինային աջակցությանը, ռազմարդյունաբերական ոլորտի զարգացմանը և Իրանին։ Հռչակագրի տեքստը հրապարակվել է ՆԱՏՕ-ի կայքում։
ՆԱՏՕ-ի անդամ երկրների ղեկավարները վերահաստատել են իրենց «անսասան հանձնառությունը դաշինքի երկրների հավաքական պաշտպանությանը»:
«Մեկի վրա հարձակումը նշանակում է հարձակում բոլորի վրա: Մեր միասնությունը, համերաշխությունը և հավաքական ուժը մնում են խաղաղության, անվտանգության և բարգավաճման հիմքը մեր ազատ և ժողովրդավարական երկրներից կազմված դաշինքի մեկ միլիարդ քաղաքացիների համար», – նշված է հայտարարության մեջ:
Հռչակագրում Ռուսաստանը նշվում է, որպես եվրատլանտյան անվտանգության համար «երկարաժամկետ սպառնալիք»։
«Ռուսաստանի կողմից եվրատլանտյան անվտանգությանն ու կայունությանը ներկայացվող երկարաժամկետ սպառնալիքին, ինչպես նաև ահաբեկչության մշտական սպառնալիքին հակազդելու համար դաշնակիցները կատարում են Հաագայի պաշտպանական պարտավորությունը: 2025 թվականին եվրոպացի դաշնակիցները և Կանադան հիմնական պաշտպանական պահանջներում իրենց ներդրումներն ավելացրել են ավելի քան 139 միլիարդ դոլարով: Մեր ներդրումներն ապահովում են մեզ անհրաժեշտ հնարավորությունները՝ միաժամանակ ամրապնդելով մեր արդյունաբերական բազան և դիմադրողականությունը: Այսօր Անկարայում մենք հայտարարում ենք ավելի քան 50 միլիարդ դոլարի նոր գնումների մասին և պարտավորվում ենք ընդլայնել հավաքական արտադրական հզորությունները և համագործակցել արդյունաբերության հետ՝ նորարարություններն արագացնելու համար», – նշված է փաստաթղթում:
ՆԱՏՕ-ի երկրների ղեկավարները նշել են, որ դաշինքի եվրոպական անդամները և Կանադան, ԱՄՆ-ի հետ համագործակցությամբ, ստանձնում են դաշինքի պաշտպանության համար ավելի մեծ պատասխանատվություն։
«Մենք կառուցում ենք ապագան. ավելի ուժեղ Եվրոպա՝ ավելի ուժեղ ՆԱՏՕ-ում՝ արդիականացված դաշինքում», – նշում են դաշնիքի անդամ երկրների ղեկավարները՝ հավելելով, որ ՆԱՏՕ-ն հանձնառու է պահպանել իր մարտական առավելությունը և ներդրումներ է կատարում զինված ուժերի տարբեր ասպեկտներում։
Բացի այդ, ըստ հռչակագրի, Ուկրաինան նպաստում է անդրատլանտյան անվտանգությանը, և դաշնակիցները միավորված են Ուկրաինային ցուցաբերվող անսասան աջակցության հարցում՝ ընդգծելով, որ այդ աջակցությունը պետք է լինի արդար, կանխատեսելի և կայուն երկարաժամկետ հեռանկարում։
Դաշնակիցները նաև խոստացել են 2026 թվականի համար Ուկրաինային տրամադրել 70 միլիարդ եվրոյի ռազմական տեխնիկա, օգնություն և ուսուցում, ինչպես նաև հաստատել են իրենց ինքնիշխան պարտավորությունները՝ 2027 թվականին պահպանելու առնվազն համարժեք մակարդակներ։
Դաշնակիցները նաև վերահաստատել են, որ Իրանը «երբեք չպետք է միջուկային զենք ունենա», և կոչ են արել Իրանին լիովին հարգել Հորմուզի նեղուցում նավարկության ազատությունը։
