Այսօր Գիտությունների ազգային ակադեմիայում մեկնարկեց «Մարդուն բնորոշ հիվանդությունների վաղ նախանշանները» չորրորդ միջազգային գիտաժողովը, որին կմասնակցեն մոլեկուլային մակարդակի վնասվածքների հետազոտությունների ոլորտի առաջադեմ գիտնականներ` Հայաստանից, Ռուսաստանից, Ֆրանսիայից և Ուկրաինայից:
Ինչպես «Առաջին լրատվական»-ի հետ զրույցում տեղեկացրեց կենսաքիմիայի ասոցիացիայի նախագահ Արմեն Գալոյանը, գիտաժողովի կազմակերպիչներն են ՀՀ ԳԱԱ Հրաչյա Բունիաթյանի անվան կենսաքիմիայի ինստիտուտը, Հայաստանի կենսաքիմիայի ասոցիացիան, ֆրանսիական SNRS ակադեմիան:
«Գիտաժողովին իրենց զեկույցներով հանդես կգան խոշոր գիտնականներ ուռուցքաբանության ոլորտից, և այն նվիրված է հիվանդությունների վաղ նախանշաններին: Հաճախ է պատահում, որ բժիշկը ուշ է իմանում, թե երբ է սկսվել հիվանդությունը: Սա նպաստում է նրան, որ կատարվեն խոշոր գիտական հետազոտություններ, թե ինչպես բնորոշել, թե հիվանդությունը սկզբնական փուլում է, թե` ոչ:
Կատարվել են լուրջ հետազոտություններ, հատկապես ուռուցքաբանության և արյան փոխներարակման ինստիտուտներում»,- նշեց Արմեն Գալոյանը` հավելելով, որ սա է գիտաժողովի հիմնական նպատակը:
