Նիգերիացի Օմար Ֆարուկ Աբդուլմուտալաբը, որը 2009 թվականի դեկտեմբերին փորձել էր Նիդեռլանդներից ԱՄՆ թռչող ինքնաթիռում պայթեցնել ռումբը, իրեն մեղավոր է ճանաչել: Այդ մասին հոմտեմբերի 12-ին հայտնել է Reuters գործակալությունը:
Ահաբեկչին 8 կետերից բաղկացած մեղադրանք է ներկայացվել` ահաբեկչություն կազմակերպելու, մահափորձի և զանգվածային ոչնչացման զենք օգտագործելու համար: Օմարը բոլոր ութ կետերով իրեն մեղավոր է ճանաչել:
Հիշեցնենք, որ 2009 թվականի դեկտեմբերի 25-ին Աբդուլմուտալաբն իր ներքնաշորի մեջ Ամստերդամից Դետրոյդ թռչող Northwest Airlines ինքնաթիռ էր տեղափոխել ռումբ, որը սակայն չէր գործել, միայն առկայծել էր: Ահաբեկիչը ծանր վնասվածքներ էր ստացել: Դետրոյդ ժամանելուն պես նա ձերբակալվել էր: Անհաջող ահաբեկչության պատասխանատվությունն իր վրա էր վերցրել «Ալ- Կաիդա» ահաբեկչական կազմակերպության եմենյան ճյուղը:
Աբդուլմուտալաբի նկատմամբ դատավարությունը սկսվել է հոկտեմբերի 5-ին:
