«Ջավախք» հայրենակցական միության նախագահ, ԱԺ «Հանրապետական» խմբակցության պատգամավոր Շիրակ Թորոսյանը հավանական է համարում, որ Վրաստանի խորհրդարանի արտոնմամբ վաճառքի հանվող ռազմավարական օբյեկտների բաժնետոմսերը կարող են հաջողությամբ ձեռք բերվել նաև հայաստանյան ընկերությունների կողմից: Նման տեսակետ նա հայտնեց «Առաջին լրատվականի» հետ զրույցում:
Հիշեցնենք, որ Վրաստանի խորհրդարանն այսօր հաստատել է «Պետունեցվածքի մասին» օրենքում ուղղումներ մտցնելու օրինագիծը, որով կառավարությանը թույլատվում է միջազգային բորսաներում վաճառել ռազմավարական օբյեկտների բաժնետոմսերի մի մասը։
Շիրակ Թորոսյանի տեղեկացմամբ՝ սա նոր պատմություն չէ, և վրացական կառավարությունն այս հարցը շրջանառության մեջ է պահում շուրջ մեկ տարի:
«Խոսքը վրացական ռազմավարական օբյեկտների բաժնետոմսերի միայն 20-25 տոկոսի մասին է: Նման քայլի անհրաժեշտությունը Վրաստանի վարչապետը բացատրում է երկրում արտասահմանյան կապիտալի ներդրման ծավալները մեծացնելու ցանկությամբ: Միաժամանակ, վրացական իշխանությունները չեն մատնանշում, թե ռազմավարական օբյեկտների բաժնետոմսերին ամենաշատը որ կապիտալն է հավակնում: Որպես շահագրգիռ կողմեր՝ նշվում են ադրբեջանցիները, թուրքերն ու ռուսները: Սակայն կարծում եմ, որ վրացական «Ռուսաստան-Հայաստան» գազատարի մասով առաջնահերթությունը պետք է տրվի հատկապես հայկական ընկերություններին, վատագույն դեպքում` ռուսական «Գազպրոմին»: Վրաստանին ձեռնտու է, որ գազատարն անխափան աշխատի և գումարներն անխափան մուտք գործեն իր բյուջե»,- նկատեց Թորոսյանը:
«Ջավախք» հայրենակցական միության նախագահն ընդգծեց նաև, որ Վրաստանի ռազմավարական նշանակության օբյեկտների մասնաբաժինների` ադրբեջանական կամ թուրքական կողմի ձեռքբերումից հետո Հայաստանի վրա ճնշումներ կգործադրվեն: «Սա, տնտեսականից զատ, նաև քաղաքական երևույթ է»,- ամփոփեց պատգամավորը:
Նշենք, որ Վրաստանը ցանկանում է վաճառել իր երկաթուղու («Վրաստանի երկաթուղիներ») և էներգահամակարգի («Վրաստանի պետական էներգահամակարգ») բաժնետոմսերի մի մասը։ Վրացական ընդդիմությունը կարծում է, որ ներկայումս վրացական օբյեկտների բաժնետոմսերին ամենաշատը հավակնելու է ռուսական կապիտալը։
Հիշեցնենք, որ ներկայումս, բացի երկաթուղուց ու էներգահամակարգից, Վրաստանը մտադիր է վաճառել նաև «Ռուսաստան-Հայաստան» գազատարը։
