Ռուսաստանը լուրջ սպառնալիք է ներկայացնում Մեծ Բրիտանիայի, և առաջին հերթին՝ երկրի կրիտիկական ենթակառուցվածքների համարա սա Միացյալ Թագավորության խոշորագույն հետախուզական գերատեսչության՝ Կառավարական կապի կենտրոնի (GCHQ) ղեկավար Էնն Քիստ-Բաթլերի սպասվող ելույթի գլխավոր թեզերից մեկն է։
Բացի Ռուսաստանից, նա կանդրադառնա նաև Չինաստանին, արհեստական բանականությանը և կիբերանվտանգությանը. հայտնում է BBC-ն։
Մինչ Քիստ-Բաթլերը ելույթ կունենա, տեքստի առանձին հատվածներ արդեն ուղարկվել են լրագրողներին։
Ինչպես նշվում է Քիստ-Բաթլերի ելույթի տեքստում, Մեծ Բրիտանիան թևակոխել է «արմատական անորոշության նոր շրջան», իսկ Ռուսաստանից և Չինաստանից հաքերների սպառնալիքների ֆոնին հնարավոր սխալ հաշվարկների ռիսկն ավելի մեծ է, քան երբևէ։
Սպասվող ելույթի տեքստի համաձայն՝ Ռուսաստանը «սպառնում է կրիտիկական ենթակառուցվածքներին, ժողովրդավարական գործընթացներին, մատակարարման շղթաներին և հանրային վստահությանը»։
«GCHQ-ն, նման ագրեսիայի և քաոսի պայմաններում, իր հետախուզական և պաշտպանական գործընկերների հետ միասին անդադար աշխատում է Ռուսաստանի կողմից բխող սպառնալիքը նվազագույնի հասցնելու համար»,— կասի Քիստ-Բաթլերը։
Նրա խոսքով՝ Մոսկվան «օրեցօր մեծացնում է իր հիբրիդային գործողությունները Մեծ Բրիտանիայի և Եվրոպայի նկատմամբ»։
Քիստ-Բաթլերը նաև կպատմի այն մասին, թե ինչպես են GCHQ-ի աշխատակիցները գաղտնի գործողություններ իրականացնում, որպեսզի «խափանեն արևմտյան տեխնոլոգիաները մաքսանենգ ճանապարհով տեղափոխելու Ռուսաստանի փորձերը», ինչպես նաև «դիմակայեն կիբերհարձակումներին և ետ մղեն անհեռատես սաբոտաժի ու սպանությունների փորձերը»։
