ԱՄՆ նախագահ Դոնալդ Թրամփը հայտարարել է, որ Միացյալ Նահանգները, հնարավոր է, ստիպված լինի նորից հարված հասցնել Իրանին, և որ ինքը գրեթե կայացրել էր հարվածելու որոշումը, սակայն հետո հետաձգել է այն:
«Ընդամենը մեկ ժամ էր պակաս, որ ես որոշում կայացնեի այսօր սկսելու մասին»,- ասել է Թրամփը՝ մեկնաբանելով երեկ արած հայտարարությունները, թե միջնորդ երկրների խնդրանքով հետաձգում է Իրանի դեմ հարվածը:
Նա նաև պնդել է, թե Իրանի առաջնորդները աղաչում են գործարք կնքել, սակայն ԱՄՆ-ի նոր հարձակումը տեղի կունենա առաջիկա օրերին, եթե համաձայնություն չձեռքբերվի. «Դե, ես նկատի ունեմ երկու կամ երեք օր, գուցե ուրբաթ, շաբաթ, կիրակի կամ նման մի բան, գուցե հաջորդ շաբաթվա սկզբին. սահմանափակ ժամանակահատված, որովհետև մենք չենք կարող թույլ տալ, որ նրանք նոր միջուկային զենք ստանան»։
Ավելի ուշ ԱՄՆ փոխնախագահ Ջեյ Դի Վենսը հայտարարել է, որ Միացյալ Նահանգներն ու Իրանը բանակցություններում զգալի առաջընթաց են գրանցել, և կողմերից ոչ մեկը շահագրգռված չէ ռազմական գործողությունների վերսկսմամբ:
Վենսը հայտնել է, որ նոր է խոսել Թրամփի հետ, և նախագահն ընդգծել է, որ ԱՄՆ-ի գլխավոր խնդիրն է՝ Իրանը չկարողանա միջուկային զենք ստանալ: Նրա խոսքով՝ եթե դա տեղի ունենա, Պարսից ծոցի երկրները նույնպես կցանկանան միջուկային զենք ձեռք բերել, իսկ նրանց կհետևեն նաև ուրիշները:
«Մենք ցանկանում ենք, որ միջուկային զենք ունեցող երկրների թիվը փոքր մնա, և հենց այդ պատճառով էլ Իրանը չի կարող միջուկային զենք ունենալ»,- ասել է նա:
