Ապօրինի զենք-զինամթերքի կամավոր հանձնումներ՝ Տավուշի համայնքային ոստիկանների բացատրական աշխատանքի արդյունքում
Ոստիկանության տարածքային ստորաբաժանումների ծառայողների հետևողականորեն անցկացվող բացատրական աշխատանքի շնորհիվ շարունակվում են ապօրինի պահվող զենք-զինամթերքի կամավոր հանձնումները:
Ապօրինի պահվող զենք-զինամթերքը կամավոր հանձնելու հերթական դեպքերն են գրանցվել Համայնքային ոստիկանության Տավուշի բաժնի ծառայողների բացատրական աշխատանքի արդյունքում։
Ոստիկանություն զանգած քաղաքացին հայտնել էր, որ զենք-զինամթերք է թողել Պառավաքար գյուղի հարակից տարածքում գտնվող աղբյուրի մոտ։ Համայնքային ոստիկանները նշված վայրում հայտնաբերել են «ՏՕԶ» տեսակի մարտական ակոսափող հրազեն, ինքնաձիգի ու գնդացրի 96 փամփուշտ և վառոդային լիցք։
Բացատրական աշխատանքի արդյունքում բաժին է ներկայացել Արծվաբերդ գյուղի մի բնակիչ և կամավոր հանձնել է «Կարաբին» տեսակի ակոսափող հրազեն։ Հայտնել է, որ այն պատկանել է հանգուցյալ պապին։
Տավուշի բաժին ներկայացած Վերին Ծաղկավան գյուղի բնակիչն էլ կամավոր հանձնել է որսորդական ողորկափող հրացան և փամփուշտներ՝ հայտնելով, որ դրանք պատկանել են հանգուցյալ պապին։
ՆԳՆ ոստիկանությունը հորդորում է քրեական պատասխանատվությունից խուսափելու համար կամավոր հանձնել ապօրինի պահվող զենք-զինամթերքը։
