ՄՆ նախագահ Դոնալդ Թրամփը հայտարարել է, որ Պարսից ծոցում մնացած նավերի ուղեկցման գործողությունը «կարճ ժամանակով» կկասեցվի՝ Թեհրանի հետ խաղաղության համաձայնագրի կնքման հնարավորությունը գնահատելու համար։
Նրա խոսքով՝ «Ազատություն» նախագիծը կդադարեցվի բանակցություններում որպես միջնորդ հանդես եկող Պակիստանի և այլ երկրների խնդրանքով։
Թրամփը Truth Social-ում գրել է, որ որոշումը կայացվել է՝ կապված «հսկայական ռազմական հաջողությունների» և Իրանի հետ խաղաղության համաձայնագրի ձեռքբերման հարցում արձանագրված «զգալի առաջընթացի» հետ։
«Քանի դեռ շրջափակումն ուժի մեջ է, «Ազատություն» նախագիծը (նավերի անցումը Հորմուզի նեղուցով) կարճ ժամանակով կկասեցվի՝ պարզելու համար, թե արդյոք կհաջողվի ավարտին հասցնել և ստորագրել համաձայնագիրը»,- հավելել է նա։
Թրամփի հայտարարությունների ֆոնին չորեքշաբթի առավոտյան ասիական սակարկությունների ժամանակ նավթի գները չնչին նվազում են գրանցել։
Իրանական պետական լրատվամիջոցները հայտարարել են՝ գործողության կասեցումը վկայում է այն մասին, որ Թրամփը «նահանջել է»՝ համաշխարհային նավագնացության համար կենսական նշանակություն ունեցող ջրային ուղին ապաշրջափակելու փորձերում կրած մի շարք անհաջողություններից հետո։
