Ապրիլի 28-ին կայացել է Վրաց ուղղափառ եկեղեցու Սինոդի նիստը։ Այդ մասին հայտնել է apsny.ge կայքը։ Սինոդի նիստում առաջադրվել է Համայն Վրաստանի կաթողիկոս պատրիարքը երեք թեկնածում։ Ինչպես և կանխատեսում էին վրացի փորձագետները, ամենաշատ ձայն ստացել է պատրիարքական տեղապահ միտրոպոլիտ Շիոն։ Նրա թեկնածությունը պաշտպանել է Սինոդի 20 անդամ։
Միտրոպոլիտ Շիոն վերջին գրեթե տասը տարիներին փաստացի Վրաց ուղղափառ եկեղեցու առաջնորդն է եղել։ Կարելի է վստահաբար ասել, որ հենց նա էլ կընտրվի Համայն Վրաստանի 142-րդ կաթողիկոս-պատրիարքը։
ՎՈՒԵ Սինոդի նիստին ընդառաջ ռուսաստանյան մի քանի լրատվամիջոցներ անդրադարձել են Համայն Վրաստանի կաթողիկոս-պատրիարքի ընտրության քաղաքական կարևորությանը։ Բանն այն է, որ չնայած Ռուսաստանի իշխանությունների կողմից Աբխազիայի անկախության ճանաչմանը, Մոսկվայի և Համայն Ռուսիայի պատրիարքը վրացական երկու նախկին ինքնավարությունները ճանաչում է Վրաց ուղղափառ եկեղեցու կանոնական տարածք։
Այս հողի վրա ՌՈՒԵ-ն նույնիսկ սուր հակասություններ է ունեցել Աբխազիայի իշխանությունների հետ, որ պահանջել են կամ ճանաչել «աբխազական եկեղեցու» ինքնուրույնությունը, կամ ծայրահեղ դեպքում հիմնադրել ՌՈՒԵ Աբխազիայի թեմ, բայց մերժում են ստացել։
Ռուսաստանյան մամուլը այս կապակցությամբ շատ հստակ ասել է, որ եթե Համայն Վրաստանի կաթողիկոս-պատրիարք ընտրվի Կոստանդնուպոլսի Հունաց տիեզերական պատրիարքի համակիր հոգեւորական, ապա Մոսկվայի և Համայն Ռուսաստանի պատրիարքարանը կընդառաջի Աբխազիայի իշխանությունների խնդրանքին։
Կաթողիկոս-պատրիարքի թեկնածության հարցում միտրոպոլիտ Շիոյին նախապատվությունը, ամենայն հավանականությամբ, նաև ներքաղաքական մոտիվացիա ունի։ ՎՈՒԵ-ն անցյալ տարի Թբիլիսիում ծավալված բողոքի զանգվածային ցույցերի շրջանում փաստացի աջակցել է «Վրացական երազանք» իշխող կուսակցությանը՝ ընդգծելով, որ Վրաստանը պետք է պահպանի ազգային ինքնությունը, հավատը և սովորությունները։
Մամուլը դեռևս այն ժամանակ է հրապարակայնացրել, որ կաթողիկոս-պատրիարքի անունից կառավարության հետ բանակցում է տեղապահ Շիոն։ Նա բարձրագույն հոգևոր կրթությունը դեռևս խորհրդային տարիներին ստացել է Մոսկվայում և, ըստ երևույթին, հանդիսանում է «Վրացական երազանքի» արտաքին քաղաքական ուղեգծի կողմնակից։
Համայն Վրաստանի կաթողիկոսի ընտրությունը պետք է կայանա ոչ ուշ, քան մինչև մայիսի 17-ը։ Մինչ այդ, ամենայն հավանականությամբ, Սինոդի անդամների կողմնորոշումը չի փոխվի, և Վրաց ուղղափառ եկեղեցին «հոգևոր եղբայրությունը» կշարունակի Մոսկվայի և Համայն Ռուսաստանի պատրիարքարանի հետ։ Չպետք է մոռանալ, որ ՎՈՒԵ-ն ավելի քան մեկ դա փաստացի ՌՈՒԵ թեմի կարգավիճակ է ունեցել և ինքնուրույնություն է ստացել միայն Երկրորդ համաշխարհային պատերազմից հետո։
