«Հեզբոլլահ»-ը հետ է մղել Իսրայելի զինվորականների փորձը՝ գրոհելու Լիբանանի հարավում գտնվող Բինթ Ջբեյլ քաղաքի վրա։ Այս մասին շարժումը հաղորդել է Telegram ալիքում։
«Պաշտպանելով Լիբանանը և նրա ժողովրդին, ինչպես նաև թշնամու կողմից հրադադարի համաձայնագրի խախտմանը և հարավային գյուղերի վրա նրա բազմակի հարձակումներին ի պատասխան՝ Իսլամական դիմադրության մարտիկները հրթիռային հարվածներով թիրախավորել են իսրայելցի զինվորների հավաքատեղիները Մուսա Աբբասի համալիրի և Բինթ Ջբեյլի արևելյան շրջանում»,- նշվում է հայտարարության մեջ։
«Հեզբոլլահ»-ը նաև նշել է, որ գործողությունները կշարունակվեն մինչև Լիբանանի և նրա ժողովրդի դեմ իսրայելա-ամերիկյան ագրեսիայի դադարեցումը։
«ՌԻԱ Նովոստի» գործակալության փոխանցմամբ՝ իսրայելական ուժերը փորձում են շրջափակել քաղաքը և մուտք են գործում ծանր տեխնիկայով՝ հանդիպելով կատաղի դիմադրության։
Նշվում է, որ քաղաքը ենթարկվել է հրետանային և օդային զանգվածային հարվածների այն բանից հետո, երբ դիմադրությունը հարձակումներ է սկսել թշնամու տեխնիկայի և անձնակազմի վրա։
Իսրայելի բանակի խոսնակ Ավիչայ Ադրային ապրիլի 14-ին հայտարարել է, որ Բինթ Ջբեյլում սպանվել է «Հեզբոլլահ»-ի մոտ 100 մարտիկ: Իսրայելի պաշտպանության բանակն իր հերթին հաստատել է իր զինվորներից մեկի մահը և երեքի վիրավորումը։
Բինթ Ջբեյլը Լիբանանի ամենամեծ քաղաքներից մեկն է, որը գտնվում է Իսրայելի հետ սահմանից չորս կիլոմետր հեռավորության վրա և ամենահեռու կետն է, դեպի ուր իսրայելական բանակն առաջ է շարժվել սահմանային գծից՝ մարտի 2-ին սկսված լարվածության սրացումից ի վեր:
