Ֆրանսիայի նախագահ Էմանուել Մակրոնը հեռախոսազրույցներ է ունեցել Իրանի և ԱՄՆ-ի իր պաշտոնակիցներ Մասուդ Փեզեշքիանի և Դոնալդ Թրամփի հետ՝ ասելով նրանց, որ հրադադարի որոշումը «հնարավոր ամենալավ» որոշումն էր և կոչ անելով այն տարածել Լիբանանի վրա։ Այս մասին նա գրել է X հարթակում։
«Ես հույս հայտնեցի, որ հրադադարը լիովին կպահպանվի հակամարտող կողմերից յուրաքանչյուրի կողմից՝ առճակատման բոլոր հատվածներում, այդ թվում՝ Լիբանանում։ Սա անհրաժեշտ պայման է, որ հրադադարը լինի հավաստի և երկարատև», – գրել է նա։
Մակրոնը հավելել է, որ ցանկացած համաձայնագիր պետք է հասցեագրի Իրանի միջուկային և բալիստիկ հրթիռային ծրագրերի, նրա տարածաշրջանային քաղաքականության և Հորմուզի նեղուցով նավարկությունը խոչընդոտող գործողությունների հետ կապված մտահոգությունները։
Նա նաև նշել է, որ Ֆրանսիան իր դերը կկատարի այդ գործընթացում՝ Մերձավոր Արևելքում իր գործընկերների հետ սերտ համակարգմամբ։
Ըստ Մակրոնի՝ նա այս թեման քննարկել է Կատարի, Արաբական Միացյալ Էմիրությունների, Լիբանանի և Իրաքի առաջնորդների հետ իր զրույցներում։
Մեկ այլ գրառման մեջ Մակրոնը հայտնել է Լիբանանի նախագահ Ժոզեֆ Աունի և վարչապետ Նավաֆ Սալամի հետ իր զրույցի մասին։ Նա խստորեն դատապարտել է Իսրայելի հարվածները Լիբանանին, որոնք մեծ զոհերի պատճառ են դարձել, և իր աջակցությունն է հայտնել այդ երկրին։
«Դրանք ուղիղ սպառնալիք են ներկայացնում ձեռք բերված հրադադարի կայունության համար։ Այն պետք է լիովին տարածվի Լիբանանի վրա։ Ես վերահաստատեցի Լիբանանի տարածքային ամբողջականությունը պահպանելու անհրաժեշտությունը և Ֆրանսիայի վճռականությունն՝ աջակցելու Լիբանանի իշխանությունների ջանքերին՝ պաշտպանելու երկրի ինքնիշխանությունը և իրականացնելու «Հեզբոլլահ»-ի զինաթափման ծրագիրը», – գրել է Ֆրանսիայի նախագահը։
