Երևանի քաղաքապետարանի առջև բողոքի ակցիաներ անցկացնող հասարակության խմբերը համալրվում են: Ինչպես վերջին ամիսներին կրպակատերերը, այսօր նաև Աբովյան-Կորյուն խաչմերուկում առևտրով զբաղվող առևտրականները քաղաքապետարանի շենքի առջև իրենց բողոքն են հայտնել քաղաքապետի` գետնանցումային կրպակների օտարման մասին որոշման դեմ: Նրանք քաղաքապետից պահանջում են իրենց իսկ կրպակները վաճառել իրենց:
Տեղեկացնենք, որ քաղաքապետի որոշման համաձայն՝ գետնանցումների կրպակները պետք է մասնավորեցվեն: Այս գործընթացն ավարտին հասցնելու համար քաղաքապետարանը մրցույթ է հայտարարել, որը կայացել է սեպտեմբերի 19-ին:
Ինչպես «Առաջին լրատվականի» հետ զրույցում տեղեկացրեց գետնանցումում ծաղկի առևտրով զբաղվող Ալլա Վարդանյանը, գետնանցումում առևտրով զբաղվողները ստեղծել են «Գետնանցում» ընկերությունը, որպեսզի համատեղ պայքարեն այս որոշման դեմ: Նշենք, որ ընկերության անդամ են գետնանցումային 43 կրպակներից 20-ի տերերը:
«Այստեղ շատ մարդիկ են աշխատում, մեր ապրուստի միակ միջոցն է, չենք ցանկանում կորցնել այս աշխատանքը` չնայած ասում են, որ նոր տերերի հետ կարող եք լեզու գտնել»,- ասաց Ալլան`հույս հայտնելով, որ գուցե ավարտին չհասցվի այս գործընթացը: