Առաջիկայում կգործարկվի «Գույքահարկի առցանց վճարման համակարգը»
Երևանի բոլոր այն բնակիչները, ովքեր ունեն անշարժ կամ շարժական գույք՝ կկարողանան համապատասխան հարկային պարտավորություններին ծանոթանալ և վճարումներ կատարել «Գույքահարկի առցանց վճարման համակարգի» միջոցով: Այս աշխատանքների ընթացքի և գործարկման փուլի մասին Երևանի քաղաքապետ Կարեն Կարապետյանին զեկուցվել է հերթական աշխատանքային խորհրդակցության ժամանակ:
«Երևան քաղաքի կառավարման տեխնոլոգիաների կենտրոն» ՓԲԸ –ի տնօրենի ներկայացմամբ ծրագիրը կգործարկվի նոյեմբերի սկզբին: Զուգահեռաբար բանակցություններ են վարվում տարբեր բանկերի հետ՝ ծրագիրը նաև բանկային համակարգում կիրառելու ուղղությամբ։
«Ծրագրի հաջող ընթացքի համար մենք պետք է ապահովենք համապատասխան տեղեկատվություն և իրականցնենք քարոզչություն, որ մարդիկ նախ տեղյակ լինեն ծրագրի գոյության մասին, ծանոթանան, ապա և օգտվեն ծառայությունից»,- շեշտել է Կարեն Կարապետյանը:
Քաղաքապետն անդրադարձել է նաև մայրաքաղաքում ընթացող շինարարական և բարեկարգման աշխատանքները սահմանված ժամկետում իրականացնելու խնդրին:
Քաղաքաշինության և հողի վերահսկողության վարչության պետի կողմից զեկուցվել է, որ ուսումնասիրություների արդյունքում, սեպտեմբեր ամսվա ընթացքում, հայտնաբերվել է պայմանագրային ժամկետի խախտման 23 դեպք։ Նշված ընկերությունները պատշաճ ծանուցվել են ժամկետների խախտման և դրանց հետևանքների մասին:
Քաղաքապետը հանձնարարել է վերջնական տեսքի բերել քաղաքի զարգացման ծրագիրը` ընդգրկելով համապատասխան նոր ներդրումային առաջարկներ:
«Մնչև 2020 թվականը ներառյալ մենք պետք է հստակ պատկերացնենք և ունենանք մեր քաղաքի զարգացման ընթացքն ու ծրագրերը և դրանում ակտիվորեն ներգրավենք ներդրողներին: Այսօր ներդրումների մեծ մասն ուղղված է մայրաքաղաքի կենտրոնին: Կարծում եմ պետք է ընդլայնենք Կենտրոն հասկացությունը, օրինակ, նոր հետիոտն փողոցների հաշվին, և այդ տարածքներում ևս կձևավորենք մշակութային, ժամանցային վայրեր և բիզնես կենտրոններ»,-նշել է Կարեն Կարապետյանը:
Կարևորելով մայրաքաղաք մտնող ճանապարհների և հարակից տարածքների արտաքին ձևավորման խնդիրը՝ քաղաքապետը հանձնարարել է արագացնել աշխատանքների ընթացքն ու զուգահեռաբար ուսումնասիրել նաև որոշ մայրուղիների ընդարձակման հարցը: Հանձնարարվել է ներկայացնել Երևանի արտաքին լուսավորման նոր ցանկ, որը կներառի ձևավորման կարիք ունեցող հուշարձանները, շենքերն ու շինությունները:
Մայրաքաղաքի կամարանցումների հետ կապված` Երևանի գլխավոր դիզայները ներկայացրել է, որ հաշվառված 217 կամարանցումներից 49 արդեն վերանորոգվել և ձևավորվել են. դրանցից 16-ը նկարազարդված են, մյուսների արտաքին ձևավորումն ընթացքի մեջ է:
Մայրաքաղաքում աշնանային ծառատունկի կազմակերպման մասով բնապահպանության վարչության կողմից զեկուցվել է, որ արդեն ձեռք է բերվել 40 հազար ծառ և թուփ, որոնք արդեն բաշխվել են վարչական շրջաններին, համատիրություններին և ուսումնական հաստատություններին։ Քաղաքի տարածքում 2011թ. իրականացվող ընդհանուր կանչապատման աշխատանքների ավարտի ժամկետ է սահմանվել նոյեմբերի 15-ը:
Խորհրդակցության ժամանակ զեկուցվել է, որ մայրաքաղաքի երթևեկությունը բեռնաթափելու նպատակով մշակվել են մի շարք ծրագրեր, այդ թվում նաև նոր շրջանցիկ ճանապահների կառուցում: Կարեն Կարապետյանը հանձնարարել է այս ուղղությամբ սերտորեն համագործակցել ճանապարհային ոստիկանության հետ և համապատասխան առաջարկություններ ներկայացնել:
Հանրակրթության վարչության կողմից տեղեկացվել է, որ «Օգնիր դպրոցիդ» և «Օգնիր մանկապարտեզիդ» ծրագրերի շրջանակում կամավոր վճարումները գերազանցել են 1 մլրդ դրամը և ներկայում հաստատությունների տնօրեններից առաջարկություններ են ներկայացվում նվիրատվությունները նպատակային օգտագործելու ուղղությամբ` մասնավորապես շենքերի վերանորոգման և նոր գույքի ձեռքբերման նպատակով:
Հանձնարարվեց կատարված աշխատանքների վերաբերյալ պարբերաբար հաշվետվություն ներկայացնել: