ԱՄՆ մի շարք քաղաքներում ֆինանսական իշխանությունների դեմ բողոքի ցույցերը Ուոլ Սթրիթից տեղափոխվում են Շվեդիա: Ինչպես գրում է The Local թերթը, պետության քաղաքականությունից դժգոհող ակտիվիստների գլխավոր ակցիան տեղի կունենա Ստոկհոլմում հոկտեմբերի 15-ին:
Ոչ պաշտոնական Occupy Together կազմակերպության փորձագետների տվյալների համաձայն` նմանատիպ ակցիաների պատրաստ քաղաքների թիվն արդեն գերազանցում է 1000-ը:
Ակցիաներն արդեն ստացել են ֆինանսիստ և միլիարդատեր Ջորջ Սորոսի աջակցությունը: Վերջինս հայտարարել է,որ «միանգամայն հասկանում է հարկատուների բարկությունը, որոնք պարտավոր են իրենց գումարները տրամադրել խնդիրներ ունեցող բանկերին»: Շաբաթ օրը ակցիայի մասնակիցներին իր աջակցությունն է հայտնել Խաղաղության Նոբելյան դափնեկիր, իրավապաշտպան Լեյմա Գբովին:
ԱՄՆ-ում «Գրավեք Ուոլ Սթրիթը» կարգախոսով բողոքի ցույցերը շարունակվում են արդեն չորրորդ շաբաթը: Ակցիայի մասնակիցները հանդես են գալիս ԱՄՆ ֆինանսական ինստիտուտների չարաշահումների դեմ: