Այսօր Երևանում բացվել է «ԱրմԹեք կոնգրես 2011» Հայաստանի բարձր տեխնոլոգիաների 4-րդ ամենայմա համաժողովը, որին մասնակցել է նաև վարչապետ Տիգրան Սարգսյանը: Այս տարի համաժողովն անցկացվում է Հայաստանի անկախության 20-ամյակին նվիրված միջոցառումների շրջանակում՝ «Սովորել անցյալից, բացահայտել ապագան» խորագրի ներքո:
Համաժողովը կազմակերպվել է Հայաստանի Հանրապետության կառավարության, Ձեռնարկությունների ինկուբատոր հիմնադրամի, «Սինոփսիս Արմենիա» ընկերության, «Վիասֆեր» տեխնոպարկի, Հայկական Զարգացման գործակալության, տեղեկատվական տեխնոլոգիաների ձեռնարկությունների միության և «Յունիքոմփ» ընկերության աջակցությամբ:
««ԱրմԹեք»-ը կառավարության կողմից պաշտոնապես ճանաչվել է բարձր տեխնոլոգիաների ոլորտի գործարար համաժողով և նպատակ ունի աջակցել այս ոլորտում մեր երկրի շարունակական զարգացումը, խթանել միջազգային գործարար կապերի ամրապնդմանն ու ներդրումների հետագա աճը: Այդ տեսակետից, վերջին երեք տարիների ընթացքում այս բնագավառում Հայաստանում տեղի են ունեցել արմատական փոփոխոխություններ»,- ասել է Տ.Սարգսյանը:
Ըստ նրա, դա առաջին հերթին դա պայմանավորված է ինտերնետի հասանելիության կտրուկ աճով: Մասնավորապես, եթե 2008 թվականին ինտերնետ կապի գինը մեկ մեգաբիտ վայրկյանի համար մեկ միլիոն 200 հազար դրամ էր, ապա 2011 թ. այն արժե 50 հազար դրամ: Եթե 2008 թ. Հայաստանում ինտերնետից օգտվում էր 80 հազար, ապա այս տարի նրանից օգտվում է արդեն 341 հազար մարդ: Բջջային հեռախոսի միջոցով ծառայություններից օգտվողների թիվը եթե 2008-ին կազմում էր մեկ միլիոն 300 հազար, ապա այսօր կազմում է 3 միլիոն 331 բաժանորդ:
««ԱրմԹեք» համաժողովն այն հարթակն է, որը հնարավորություն է տալիս կառավարությանը ոլորտի մասակիցների հետ միասին նայել դեպի ապագան, բացահայտել Հայաստանի հարաբերական առավելություններ ու շեշտադրումներ կատարել դրանց վրա»,- նշել է Տ.Սարգսյանը՝ հավելելով, որ այդ տեսակետից, վերջին տարիների փորձը ցույց է տալիս, որ ՀՀ հարաբերական առավելությունը մեր տաղանդաշատ մասնագետներն են. «Դա է պատճառը, որ այս ոլորտում մենք սկսել ենք մասնագիտանալ առաջին հերթին բարդ ծրագրային արտադրանքներ տալու մեջ»:
