Ադրբեջանական APA լրատվական գործակալության փոխանցմամբ՝ Շվեդիայի խորհրդարանում քննարկվելու է Լեռնային Ղարաբաղի վերաբերյալ ադրբեջանամետ բանաձևը, որի հեղինակն ադրբեջանական լոբբիստներն են։
Նշվում է, որ սա Շվեդիայում բնակվող ադրբեջանական համայնքի պատրաստած երկրորդ բանաձևն է։ Առաջին խորհրդարանական բանաձևը նվիրված է «Հարավային Ադրբեջանում» (Իրան) մարդու իրավունքների շուրջ տիրող իրավիճակին, իսկ երկրորդով Հայաստանից պահանջվում է զինված ուժերը դուրս բերել Ադրբեջանի «օկուպացված» տարածքներից և ադրբեջանցի փախստականների վերադարձնել իրենց տները։
Ղարաբաղի վերաբերյալ բանաձևի նախագիծը հոկտեմբերի 5-ին գրանցվել է Կանաչների կուսակցության խմբակցության ղեկավար Մեհմեթ Քափլանի կողմից։ Դրանում նշված է, որ Լեռնային Ղարաբաղում բնակվողների «անջատողական» ձգտումների պատճառով «մոտ 1 միլիոն» ադրբեջանցիներ ստիպված են եղել լքել իրենց տները։ Դրանում հիշատակվում է նաև Խոջալուի սպանդի (որն իրականում իրականացրել է հենց ադրբեջանական կողմը.- 1in.am) և տարբեր միջազգային կառույցների կողմից Ղարաբաղի վերաբերյալ ընդունած բանաձևերի մասին։
Նշվում է, որ մինչև շվեդական խորհրդարանի կողմից բանաձևի վերաբերյալ քվեարկությունը, այն պետք է դիտարկի խորհրդարանի արտաքին գործերով կոմիտեն։