«Անշուշտ, դեսպանը նման հայտարարություն անելու իրավունք չունի, դա լոյալության սկզբունքի կոպիտ խախտում է: Անկախ նրանից, թե դեսպանը ինչ է մտածում՝ որպես մարդ, որպես արվեստագետ, բայց լինելով պետության ներկայացուցիչ՝ նա պետք է միայն ասի այն, ինչ որ ընդունված է արտաքին հարաբերությունների շրջանակով»,- այսօր լրագրողների հետ հանդիպման ժամանակ անդրադառնալով Շառլ Ազնավուրի վերջին հարցազրույցին՝ կարծիք հայտնեց ՀՀ դիվանագիտական կորպուսի նախկին անդամ, նախկին դեսպան Արման Նավասարդյանը:
Հիշեցնենք, որ Nouvelles d’Arménie ֆրանսիական ամսագրին տված հարցազրույցում Շվեյցարիայում Հայաստանի դեսպան Շառլ Ազնավուրը հայ-թուրքական հարաբերության համատեքստում հայտարարել է. «Իսկ Հայաստանը տառապում է, Հայաստանն օրեցօր դատարկվում է։ Իսկ ո՞ւմ է ձեռնտու դա։ Մաֆիայի մի քանի պարագլուխների՞»:
Նավասարդյանը նկատեց, որ եթե դեսպանը նման կերպ է մտածում, ապա նա պետք է անմիջապես դրանից հետո կամ դրանից առաջ հրաժարվեր իր պաշտոնից, կամ նրան պետք է շնորհազրկեն: Արձագանքին, թե թվարկած քայլերից որևէ մեկը, բնականաբար, չի կատարվի, Նավասարդյանը նշեց, որ դա արդեն հարցի մյուս կողմն է. «Եթե սխալը կատարվել է ի սկզբանե, ապա ինչպես ասում են՝ էշի վրա նստելը մի այիբ է, իջնելը՝ մեկ ուրիշ: Սա արդեն խոսում է այն մասին, որ ՀՀ արտաքին գործերի ոլորտում կադրային քաղաքականությունը դրված է սխալ սկզբունքների վրա»:
Նավասարդյանը նաև հավելեց, թե ինքը դեմ է, որ արվեստագետը նշանակվի դեսպանի պաշտոնում, և նկատեց, որ Ազնավուրը ՅՈՒՆԵՍԿՕ-ի դեսպան ևս եղել է, ինչը որևէ բան չի տվել Հայաստանին, և հայկական պատմամշակութային արժեքները շարունակել են ոչնչացվել:
Քաղաքագետ-վերլուծաբան Երվանդ Բոզոյանն էլ նկատեց, որ ՀՀ արտաքին և ներքին քաղաքականության առումով «թամաշաների էլեմենտը» շատ մեծ է. «Թամաշա անելը` միջազգային կենտրոնները սարքելը, Գյումրիում ծով, Դիլիջանում ֆինանսական կենտրոն սարքելը բավական տարածված թեմա է, և հենց այդ թամաշայի շարքի մեջ է հայտնի Շառլին դեսպան նշանակելը»:
Բոզոյանը նշեց, որ Շառլ Ազնավուրը կարող էր նման հայտարարություն անել՝ որպես մեծ հայ մարդ, և այդ կարծիքը ինքը ևս կիսում է. «Իսկապես, ծիծաղելի է խոսել հայկական աշխարհի մասին, երբ Հայաստանը դատարկվում է, և այդ գործընթացը չի մտահոգում իշխանական վերանխավին: Ես ուրախ եմ, որ սփյուռքում դա նկատվել է, Արամ Առաջինը այդ միտքն առաջինը հնչեցրեց, և այսօր դա ասում է նաև Շառլը»:
