Դարեր շարունակ ձմեռային գլխավոր տոնը Ռուսաստանում Սուրբ Ծնունդն էր։ Ամանորը կարծես լուծվում էր այդ մեծ իրադարձության մեջ։ Խորհրդային տարիներին, գաղափարական պատճառներով, Սուրբ Ծնունդը մոռացության մատնվեց, և մնաց միայն Ամանորը։ Վերջին տասնամյակներում աստիճանաբար վերադառնում են Քրիստոսի Ծննդյան տոնին, որպես տարվա կարևորագույն տոներից մեկի։
Սուրբ Ծնունդը ցարական Ռուսաստանում
Ցարական Ռուսաստանում սուրբծննդյան տոնախմբությունները սկսվում էին գիշերային ժամերգությունից հետո, որն անցկացվում էր երկրի բոլոր եկեղեցիներում։ Առաջին հերթին տոնը շքեղ ընթրիք էր և սուրբծննդյան պարահանդես։ Հաճախ խաղում էին լոտո՝ խաղարկելով թանկարժեք նվերներ։ Տոնակատարությունն ուղեկցվում էր բենգալական կրակների այրմամբ, պայթուցիկների ձայներով, պարերով, խաղերով և խմբապարերով։ Նոր տարվա եղևնին զարդարելու և նրա շուրջը խմբապար վարելու ավանդույթը հայտնվեց ավելի ուշ։
Նոր տարվա եղևնին՝ Պետրոս Առաջինից մինչև մեր օրեր
Եվրոպական Նոր տարվա և Սուրբ Ծննդյան ավանդույթները Ռուսաստան բերեց Պետրոս Առաջինը՝ իր բարեփոխումների հետ։ Եվրոպայում եղևնիները սկսել էին զարդարել դեռևս 16-րդ դարից։ 20-րդ դարի առաջին երրորդում Ռուսաստանում եղևնիները հայտնվեցին արգելքի տակ. նախ, Առաջին համաշխարհային պատերազմի տարիներին՝ Սուրբ Սինոդի որոշմամբ, որպես «գերմանական ավանդույթ», ապա՝ ԽՍՀՄ սկզբնական շրջանում՝ որպես «բուրժուական անցյալի մնացուկ»։ Միայն 1936 թվականից խորհրդային քաղաքացիներն ազատորեն կարող էին տանը տեղադրել և զարդարել կանաչ գեղեցկուհիներին։
Ամանորը ԽՍՀՄ-ում. կուրանտներ, շամպայն և մանդարիններ
Պատշգամբում սառած մանդարինների հոտը, կենդանի եղևնու բույրը, բարձր բաժակներում շամպայնի փրփուրը, հեռուստացույցից հնչող ուրախ երգերը, «մայրաքաղաքային» աղցանի և շոկոլադե կոնֆետների համը… Այս ամենը ծանոթ է բոլոր նրանց, ովքեր հիշում են, թե ինչպես էին Խորհրդային Միությունում դիմավորում Ամանորը։ Հազարավոր տներում՝ ամբողջ հսկայական երկրով մեկ, տոնը նշում էին նույն կերպ. անպայման կենացներ, նույն ֆիլմերով, «Երկնագույն կրակ» երաժշտական հաղորդմամբ։ Եվ, իհարկե, Ձմեռ Պապն ու Ձյունանուշը, որոնք ամբողջ նախատոնական շաբաթվա ընթացքում անխոնջ շնորհավորում էին երեխաներին և մեծ, գունեղ պարկով բերում նվերներ՝ հիմնականում գեղեցիկ տուփերով քաղցրավենիք։
