ՀԱԿ տնտեսական հանձնաժողովի անդամ Վահագն Խաչատրյանը, դիմելով Ազատության հրապարակում հավաքված ժողովրդին, նշեց, որ այն, ինչ որ կատարվում է հրապարակում, ապացույցն է նրա, որ ժողովուրդը ցանկանում է ապրել ազատ ու արդար Հայաստանում. «Իշխանությունը կարծես թե ուզում է աշխատել, բայց չի ստացվում, չեն էլ կարողանում թաքցնել, որ չի ստացվում»:
Հայաստանի բյուջեին անդրադառնալով՝ Խաչատրյանը այն որակեց ոչինչ չասող բյուջե և հավելեց, որ ավազակապետությունն աշխատում է միմիայն իր օլիգարխների համար, նպաստներն ու թոշակները չեն բարձրանալու, ոչ մի գործարար իրեն չի զգալու ազատ երկրում. «Որ նայում ես բյուջեին, համոզվում ես, որ այս կառավարությունը թքած ունի բոլորիս վրա, մենք նրանց չենք հետաքրքրում, գոյություն չունենք նրանց համար, մենք գոյություն ունենք որպես սուբյեկտ, որից կարելի է թալանել»:
Խաչատրյանը նշեց, որ արտաքին պարտքը աճելու է, մասնավորապես տեղեկացրեց, որ 2010թ. արտաքին պարտքը եղել է 3 մլրդ 300 մլն, 2011-ին լինելու է 3 մլրդ 800 մլն, 2012-ին` 4 մլդ 120 մլն:
Ըստ Խաչատրյանի՝ կառավարությունը «բարեփոխումներ» է անում և ստիպում հավաքել հարկերը, ինչին ընդդիմացող կա՝ ի դեմս ՊԵԿ նախագահ Գագիկ Խաչատրյանի. «Նա դրանց միջի ազնիվն է, որովհետև գիտի, որ այդ հարկերը չի կարողանալու հավաքել, որ եթե հավաքի, ապա պետք է հավաքի օլիգարխներից, իսկ օլիգարխները հարկ չեն վճարում, նշանակում է՝ ինքը նորից պետք է փոքր և միջին ձեռնարկատերերից հավաքի այդ հարկը»:
Վահագն Խաչատրյանի գնահատմամբ՝ եթե տնտեսության մեջ ազատություն լինի, ապա ներկայիս որակների իշխանություն չի կարող լինել: Նրա խոսքերով՝ ներկայիս իշխանության պարագայում տնտեսական զարգացման հեռանկար չկա, քանզի այս իշխանությունը սնանկ է ամեն ինչով, այդ թվում՝ տնտեսության կառավարման իմաստով: Ըստ նրա՝ եթե ցանկանում ենք վերացնել այս վիճակը, ապա պետք է շարունակել պայքարը՝ այնքան ժամանակ, քանի դեռ այս իշխանությունները չեն հեռացել. «Յուրաքանչյուրիս պայքարն է սա»: