Հայաստանի աշխատանքի և սոցիալական հարցերի նախարար Արսեն Թորոսյանն անդրադարձել է «Մեր ձևով» շարժման համակարգող Նարեկ Կարապետյանի այն հայտարարությանը, թե Հայաստանի գործող իշխանությունները իրենց պաշտոնավարման ժամանակահատվածում չեն կարողացել նվազեցնել աղքատության մակարդակը։
Արսեն Թորոսյանը «Ֆեյսբուք»-ի իր էջում հրապարակած տեսանյութում հերքել է Նարեկ Կարապետյանի այդ հայտարարությունը՝ իր հերթին «Մեր ձևով» շարժման ներկայացուցիչներին մեղադրելով աղքատության խորացմանը նպաստելու մեջ։
«Հարգելի հայրենակիցներ, այսօր պետք է անդրադառնամ հայտնի ռուս օլիգարխի կողմից ստեղծված շարժման հերթական մանիպուլյացիային, որը պնդում է, որ մենք չենք կարողացել իջեցնել աղքատությունը Հայաստանում. մի շարժում, որ ինքն է նպաստել աղքատության խորացմանը՝ ՀԷՑ-ի միջոցով, ըստ էության, գողանալով մեզնից յուրաքանչյուրից՝ կազմակերպելով բարձր գնով տենդերներ, վարձակալությամբ վերցնելով ինչ-որ անհասկանալի մեքենաներ, հավելագրումներ կատարելով մեր հաշվիչների վրա։ Եվ հիմա նրանք խոսում են ինչ-որ աղքատությունից, որը մենք չենք կարողացել նվազեցնել, ինչն, ի դեպ, ամբողջովին հակառակն է»,- ասել է Թորոսյանը։
Թորոսյանը ներկայացրել է ծայրահեղ աղքատության ցուցանիշը 2024 թվականի արդյունքներով, որը, ըստ նախարարի, ավելի ցածր է, քան եղել է 2021-2023 թվականներին։
«Առաջինը ծայրահեղ աղքատության թվերի մասին եմ ուզում խոսել. նույնը, ի դեպ, սովորական աղքատությանն է վերաբերում, բայց ծայրահեղ աղքատությունն ամենակարևոր ցուցանիշներից է, որը մենք 2024 թվականին արձանագրել ենք 0.6 տոկոս, ավելի ցածր քան 2023-ին, 2022-ին և 2023-ին, և ես վստահ եմ, որ 2025-ին մենք շատ ավելի լավ ցուցանիշներ ենք ունենալու»,- ասել է նախարարը։
Արսեն Թորոսյանը հավելել է, որ 2018 թվականի մայիսին Հայաստանում եղել է 563 հազար աշխատատեղ, իսկ 2025 թվականի հոկտեմբերի դրությամբ՝ 810 հազար աշխատատեղ, աճը՝ 44 տոկոս։
«Դրանք իրական աշխատատեղեր են, որտեղ մարդիկ աշխատում են և վաստակում են իրենց ապրուստը՝ գնալով ստանալով ավելի շատ աշխատավարձ։ Եվ մենք աղքատության դեմ պայքարը և աղքատությունից դուրս գալը պատկերացնում ենք հենց աշխատանքով, և ոչ թե ինչ-որ փրկիչ բարերարների, ռուս օլիգարխների կողմից, որոնք կգան և կփրկեն բոլորիս։ Մենք կուշտ ենք բոլոր տեսակի փրկիչներից, ինքներս պետք է վերցնենք մեզ աղքատությունից հանելու պատասխանատվություն, ինչն արել ենք և անում ենք։ Կոչ եմ անում չտրվել տարբեր շարժումների կողմից մանիպուլյացիաներին, որոնք սովորաբար իրենք են նպաստած լինում ամեն ինչին, այս դեպքում՝ աղքատությանը»,- եզրափակել է Թորոսյանը։
«Մեր ձևով» շարժման համակարգող Նարեկ Կարապետյանն ավելի վաղ հայտարարել էր, թե Վրաստանում աղքատությունը մեկ տարում նվազել է 2.4 տոկոսով, իսկ Հայաստանի գործող իշխանությունը իր կառավարման ժամանակահատվածում չի կարողացել աղքատությունը նվազեցնել նույնիսկ 2.4 տոկոսով։ Կարապետյանը կարծիք էր հայտնել, թե իր հորեղբայրը՝ գործարար Սամվել Կարապետյանը, հազարավոր մարդկանց կհանի աղքատությունից։
