ՆԳՆ Փրկարար ծառայության Սյունիքի, Գեղարքունիքի և Տավուշի մարզային փրկարարական վարչությունները դեկտեմբերի 12-ից 16-ը հյուրընկալել էին Հայկական Կարմիր խաչի ընկերության մարզային ներկայացուցիչներին և կամավորներին:
Այս մասին հայտնում են ՀՀ ՆԳՆ փրկարար ծառայությունից՝ նշելով, որ Կարմիր խաչի ներկայացուցիչները մասնակցել են մասնագիտական սեմինար-պարապմունքների, որտեղ քննարկվել են մարզերին բնորոշ քաղաքացիական պաշտպանության հիմնախնդիրները, արտակարգ իրավիճակներում բնակչության պաշտպանության արդյունավետ միջոցառումները և երկկողմ փոխգործակցության ուղղությունները:
Ճանաչողական այցերի շրջանակում հրշեջ-փրկարարները կամավորներին ներկայացրել են արտակարգ իրավիճակներում օգտագործվող հատուկ գույքի և սարքավորումների առանձնահատկությունները, տեխնիկական հնարավորությունները, արտակարգ դեպքերին արձագանքման մեխանիզմները:
Կամավորները ծանոթացել են նաև մարզային փրկարարական վարչությունների ճգնաժամային կառավարման կենտրոնների աշխատանքային գործընթացին, տեխնիկական ներուժին և արտակարգ իրավիճակների արձագանքման համակարգին:
Գերատեսչությունից նշում են, որ նման հանդիպումները միտված են ՆԳՆ Փրկարար ծառայության և Հայկական Կարմիր խաչի ընկերության համագործակցության ամրապնդմանն ու ընդլայնմանը: Փորձի փոխանակումը և համատեղ աշխատանքների պլանավորումը նպաստում են հանրային անվտանգության համակարգի ամրապնդմանն ու արտակարգ իրավիճակներում արդյունավետ արձագանքման ապահովմանը:
