Հայաստանի կրթության, գիտության, մշակույթի և սպորտի նախարարի տեղակալ Արաքսիա Սվաջյանը և նախարարի խորհրդական Արտաշես Թորոսյանը չնախատեսված այց են կատարել Երևանի Հենրի Մորգենթաուի անվան թիվ 126 և Երևանի թիվ 185 հիմնական դպրոցներ:
Նախարարությունից հայտնում են, որ պաշտոնյաները շրջել են դպրոցներում, տեղեկացել առկա խնդիրներից, զրուցել աշակերտների հետ: Մասնավորապես՝ Արաքսիա Սվաջյանը բարձր դասարաններում սովորող աշակերտների հետ զրույցում հետաքրքրվել է՝ ինչ մասնագիտական կողմնորոշում ունեն նրանք, ինչ հաճախականությամբ են մասնակցում նախագծային աշխատանքներին, որքանով են դրանք դուր գալիս սովորողներին և այլն:
Նախարարի տեղակալին հետաքրքրել է նաև 9-րդ դասարանցիների ավարտական քննությունների նախապատրաստման ընթացքը՝ պայմանավորված Հանրակրթության պետական չափորոշչի նոր ձևաչափով. բնագիտական, տեխնոլոգիական, ճարտարագիտական և մաթեմատիկական առարկաներից սովորողներն իրենց ընտրությամբ հանձնելու են թեստայի՞ն, թե՞ նախագծային աշխատանք։
Կրտսեր դասարանների աշակերտները պատմել են իրենց սիրած առարկաների, գրքերի ու նախասիրությունների մասին:
Արաքսիա Սվաջյանը կարևորել է նոր չափորոշչի ներդրման արդյունքների շուրջ քննարկումները թե՛ աշակերտների, թե՛ մանկավարժական կազմի հետ՝ դրանք հնարավորինս նպատակային իրականացնելու համար: Կարևորելով նոր չափորոշիչով սահմանված պահանջների գործնական կիրառումը՝ նախարարի տեղակալն ընդգծել է կառավարչական և փաստաթղթային ընթացակարգերի պահպանման վերահսկողությունը:
Երևանի Հենրի Մորգենթաուի անվան թիվ 126 հիմնական դպրոցում սովորում է շուրջ 190, Երևանի թիվ 185 հիմնական դպրոցում՝ 520 աշակերտ:
