ՀՅԴ Աժ պատգամավոր Արտյուշա Շահբազյանից այսօր լրագրողները հետաքրքրվեցին, թե պատրաստվո՞ւմ են հետևել «Ժառնգության» ղեկավար Րաֆֆի Հովհաննիսյանի օրինակին և գնալ Ազատության հրապարակ, ինչին ի պատասխան նա հարցրեց, թե ինչո՞ւ պետք է հետևեն «Ժառնգության» օրինակին` անկախ նրանից, որ հարգում են Րաֆֆի Հովհաննիսյանին:
Ինչ վերաբերում է ՀՅԴ-ի առաջիկա անելիքներին, Ա. Շահբազյանն ասաց, որ կազմակերպչական աշխատանքներն իրենք արդեն ավարտել են, և, եթե ընտրությունները վաղն էլ սկսվեն` իրենք պատրաստ են: Իսկ ներկա պահին զբաղվելու են հասարակությանը ընտրողների իրավունքներին ծանոթացնելով:
Արտյուշա Շահբազյանը լրագրողների խնդրանքով արձագանքեց Լևոն Տեր-Պետրոսյանի այն հայտարարությանը, որ ինքն ավելի լավ է տիրապետում ՀՅԴ-ի գաղափարախոսությանը, քան ցանկացած դաշնակցական: Նա ասաց, որ, եթե լավ գիտի, լավ կվերաբերվեր` չնայած համաձայնեց, որ Լևոն Տեր-Պետրոսյանը Հայաստանի «բանիմաց քաղաքացիներից» է:
Անդրադառնալով ՀԱԿ-ի այն հայտարարությանը, թե չի բացառվում, որ արդար ընտրությունների համար իրենց հետ համագործակցեն, նա նշեց, որ ՀՅԴ-ի առաջարկած Ընտրական օրենսգրքով դա չեն բացառում, այլ հարց է` կա՞ նման ցանկություն:
Ինչ վերաբերում է հայ-թուրքական արձանագրություններին, Շահբազյանը նշեց, որ գործընթացի ներկա վիճակը բխում է Թուրքիայի շահերից, սակայն կարծում է, որ այս գործընթացը դեռ կմնա օդից կախված:
Իսկ Ռոբերտ Քոչարյանի վերադարձի մասին ասաց, թե դա իր բացատրելիքը չի: