Հայ ազգային կոնգրեսի համակարգող Լևոն Զուրաբյանն իր այսօրվա ելույթում նույնպես անդրադարձավ ԵԽԽՎ Մոնիտորինգի հանձնաժողովի կողմից ընդունված բանաձևին: Նա նկատեց, որ այն նախագիծը, որը Մոնիտորինգի հանձնաժողովի կողմից ներկայացվել էր լիագումար նիստին, ուղղակի խայտառակություն էր և այդ կապակցությամբ ՀԱԿ-ը խիստ հայտարարություն արեց դատապարտելով նման բանաձևը:
Զուրաբյանը նշեց, որ ՀԱԿ-ի քննադատությունը շատ լուրջ ազդեցություն է ունեցել և բանաձևում երեք կարևոր փոփոխություն է արվել: Մասնավորապես, Զուրաբյանի տեղեկացմամբ, նախագծում նշված Մարտի 1-ի էջը փակված համարելու եզրույթը փոխվել է և գրվել է, որ Մարտի 1-ի էջը կարող է փակված համարվել Վեհաժողովի համար, բայց պետք է շարունակվի ԵԽ մոնիտորինգը տասը սպանությունների բացահայտման դեպքում. «Սա շատ կարևոր փոփոխություն է, որը մենք պահանջել ենք ԵԽ-ից»:
Լևոն Զուրաբյանը նաև նշեց, որ ԵԽԽՎ-ն կասկածի տակ էր դրել ընդդիմության պահանջը արտահերթ ընտրությունների անցկացման վերաբերյալ, ինչի վերաբերյալ ՀԱԿ հայտարարությունում ասվել էր, որ դա միջամտություն է Հայաստանի ներքին գործերին. «Ընդունված բանաձևում այդ դրույթը հանված է: Եվ երրորդ՝ ԵԽԽՎ-ն ընդառաջել է մեր պահանջին դիտորդական մեծ խումբ ուղարկել Հայաստանի խորհրդարանական ընտրություններին»:
Զուրաբյանը նշեց, որ այս երեք հաղթանակները ձեռք են բերվել շնորհիվ Մարտի 1-ի 10 զոհերի ծնողների պայքարի, շնորհիվ ՀԱԿ դիվանագիտական աշխատանքի ու, որ ամենակարևորն է, շնորհիվ ամենօրյա հանրահավաքների:
Անդրադառնալով ՀԱԿ հասցեին հնչող քննադատություններին՝ Զուրաբյանը նշեց, որ ՀԱԿ շուրջօրյա հանրահավաքների փաստը ցույց է տալիս շատ քննադատների սնանկությունը. «Շատերը հայտարարում էին, թե Կոնգրեսն էլի ժողովրդին տուն է ուղարկելու, բայց նման բան չեղավ, մենք գնացել ենք վճռական քայլերի: Իրենց վճռական հորջորջող հակակոնգրեսական գործիչներն այսօր Ազատության հրապարակում չեն: Ի՞նչ է, չէի՞ք մտածում, որ կգնանք վճռական քայլերի, ու դրա համար էիք ասում՝ գնացեք, մենք կմիանանք, է, սկսել ենք, դե միացեք»:
ՀԱԿ համակարգողը շեշտեց, որ բոլոր քաղաքական ուժերը մի բան պետք է հասկանան` ժողովուրդն ամեն ինչ արձանագրում է իր հիշողության մեջ, ժողովրդին հնարավոր չէ խաբել Ազատության հրապարակ այցելելով. «Կամ դուք այստեղ եք ու ենթարկվում եք ռեժիմի կողմից գործադրվող ճնշումներին, որ գործադրվում է այստեղ հավաքվածների վրա, կամ դուք զբաղված եք վճռական քայլերի ելած մարդկանց վարկաբեկելով` դառնալով ռեժիմի գործակալներից մեկը»:
Ըստ Զուրաբյանի՝ ժողովուրդը հստակ է արձանագրելու, թե վճռական պայքարի ժամանակ ով է նրա կողքին կանգնած պայքարում ռեժիմի դեմ և ով մամուլի էջերում հայտնվելու համար է այցելություններ կատարում Ազատության հրապարակ: Ըստ նրա՝ ովքեր խռովել են ժողովրդից ու նրա կողքին չեն, ժողովուրդն էլ նրանցից է խռովում. «Կոնգրեսից ժողովուրդը չի խռովելու, որովհետև միասին ենք կրում ռեժիմի հարվածները և պատրաստ ենք դա անել մինչև վերջ: Մենք պատրաստ ենք համագործակցել բոլոր այն ուժերի հետ, ովքեր այս մոտեցումն ունեն, որովհետև մեզ համախմբում է մի ժողովուրդ, որը պատրաստ է պայքարելու, և թող այդ ժողովուրդը լինի մեր բոլոր արարքների գնահատման բարձրագույն ատյանը»:
Լևոն Զուրաբյանը նաև տեղեկացրեց, որ վաղը՝ 6:30-ին լինելու է «մինի» հանրահավաք, որից հետո մեծ էկրան է տեղադրվելու Ազատության հրապարակում, և բոլորը միասին հետևելու են Հայաստան-Մակեդոնիա ֆուտբոլային խաղին: Նա նաև շեշտեց, որ շաբաթ օրը լինելու է կարևոր օր, քանզի ութօրյա հանրահավաքի վերջին օրն է, պետք է բոլորը հավաքվեն Ազատության հրապարակում, քանզի «կարևոր որոշումներ ընդունելու կարիք կա»: