«Երկխոսել սեփական ժողովրդի հետ մեծագույն պատիվ է և պատասխանատվություն, երկխոսել քաղաքական անբարոյականների հետ` պառակտություն է»,- նման խոսքերով սկսեց իր ելույթը ՀԺԿ վարչության քարտուղար Ֆելիքս Խաչատրյանը:
Այսօրվա հանրահավաքի իր ելույթում նա անդրադարձավ ԱԺ ՀՀԿ խմբակցության պատգամավոր Գագիկ Մինասյանի այն հայտարարությանը, թե ՀԱԿ հանրահավաքները անօրինական են:
«Պարոն Մինասյան, անօրինականը դուք եք, 14 տարի է խցկվել եք իշխանության մեջ, կառչել իշխանությունից, և այդ ընթացքում կրոնափոխ եք եղել մի քանի անգամ»,- պատասխանեց Մինասյանին Խաչատրյանը:
Նա հիշեց Մինասյանի քաղաքական ճանապարհը՝ նշելով, թե ինչպես վերջինս խորհրդարան է մտել Տեր-Պետրոսյանի գլխավորած ցուցակով, մեկ տարի անց ճողոպրել ԵԿՄ, հետո «Միասնություն» դաշինք և այդպես շարունակ՝ մինչև ՀՀԿ: «Պարոն Մինասյան, ձեզ հաջողվեց ձեր հարազատ ընկերոջը` Տիգրան Թորոսյանին, պաշտոնանկ անել, այ սա է ձեր բարոյականությունը»,- հավելեց Խաչատրյանը:
Նա նշեց, որ ժողովուրդն այս երկրի տերն է, և Ազատության հրապարակն էլ ժողովրդինն է. «Մենք իրավունք ունենք ցանկացած պահի հավաքվել մեր երկրի Ազատության հրապարակում»:
