Ռուսաստանի և Ուկրաինայի միջև պատերազմը դադարեցնելու համար պետք է խաղաղության հասնելու ջանքեր գործադրվեն: Այս մասին Սպիտակ տանը տեղի ունեցած հանդիպումից հետո NBC News-ի եթերում հայտարարել է Ֆրանսիայի նախագահ Էմանուել Մակրոնը։
«Երբ նայում եմ իրավիճակին և փաստերին, չեմ տեսնում, որ նախագահ Պուտինը շատ պատրաստակամ է խաղաղություն հաստատելու հիմա: Սակայն, գուցե, ես չափազանց հոռետես եմ», – նշել է Մակրոնը «Meet the Press» հաղորդման ընթացքում։
Մակրոնը պնդել է, որ Միացյալ Նահանգները պետք է ճնշում գործադրի Ռուսաստանի և նախագահ Վլադիմիր Պուտինի վրա՝ լուծում գտնելու համար, այդ թվում՝ ավելի շատ պատժամիջոցներ սահմանելու միջոցով։
«Եթե Պուտինի և Ուկրաինայի նախագահ Վոլոդիմիր Զելենսկու միջև նախագահ Դոնալդ Թրամփի կողմից հայտարարված երկկողմ հանդիպման ժամանակ առաջընթաց չգրանցվի, և եթե եռակողմ հանդիպումը ձախողվի, կամ եթե ռուսները չհետևեն այս մոտեցմանը, այո, մենք պետք է ուժեղացնենք պատժամիջոցները՝ երկրորդային և առաջնային», – ասել է Մակրոնը։
Եվրոպացի առաջնորդների և ԱՄՆ նախագահ Դոնալդ Թրամփի միջև բանակցություններից հետո Ֆրանսիայի նախագահ Էմանուել Մակրոնը լրագրողների հետ զրույցում նշել է, որ հակամարտության ավարտից հետո Ուկրաինայի անվտանգության հիմնական երաշխիքներից մեկը «հարյուր հազարավոր» մարդկանցից բաղկացած և Ռուսաստանին զսպելու ունակ ուկրաինական բանակի պահպանումն է։
Մակրոնը նշել է, որ իր կարծիքով՝ Թրամփի վարչակազմը պատրաստակամություն է հայտնել մասնակցել Ուկրաինայի անվտանգության երաշխիքների ապահովմանը։
Ավելի ուշ Էմանուել Մակրոնը X հարթակում նույնպես անդրադարձել է Դոնալդ Թրամփի հետ հանդիպմանը։
«Վաշինգտոնում նախագահ Զելենսկու և մեր գործընկերների հետ մենք վերահաստատեցինք նախագահ Թրամփին մեր վճռականությունը՝ շարունակելու միավորել մեր ջանքերն ամուր և տևական խաղաղության համար, որը կպաշտպանի Ուկրաինայի շահերը և Եվրոպայի անվտանգությունը», – գրել է Մակրոնը։
Նա նաև նշել է, որ «նման խաղաղությունն անպայման կպահանջի Ուկրաինային տրամադրել ամուր անվտանգության երաշխիքներ, որոնց շուրջ մենք որոշել ենք շատ կոնկրետ աշխատել Միացյալ Նահանգների հետ»։
«Մեզ համար նաև պարզ է, որ Ռուսաստանի վրա ճնշումը պետք է շարունակվի այնքան ժամանակ, քանի դեռ այս խաղաղությունը չի հաստատվել», – նշել է նա։
