«Ես երբեք չէի մտածի, որ հանրահավաք կանեն զուգարանների համար, կարծեցի՝ լրագրողները կատակ են անում, և առաջարկեցի «գարշոկներ» բաժանել: Անհարմար է մեր երկրի և մեր պետության համար, որ ժողովրդին հավաքեն ու զուգարանի պահանջ դնեն»,- Ազատության հրապարակի շրջակայքում գտնվող հասարակական զուգարանների փակ լինելու խնդրին անդրադառնալով՝ լրագրողների հետ հանդիպման ժամանակ կարծիք հայտնեց ԱԺ ՀՀԿ խմբնակցության ղեկավար Գալուստ Սահակյանը:
Ինչ վերաբերում է շրջակա սրճարանների փակմանը, Սահակյանը նշեց, որ դա սրճարանների սեփականատերերի ձեռնարկատիրական իրավունքն է, նրանք չեն աշխատում, որովհետև միտինգներ են անում:
«Վրան ունեն, չէի՞ն կարող՝ շարժական զուգարաններ էլ բերեին, բա ի՞նչ անենք, մե՞նք գնանք շարժական զուգարան բերենք, այսինքն՝ պայքարում են, որ մենք իրենց զուգարաններ տանք` ծիծաղելի է: էդ դեպքում վաղն էլ կարող են ասել՝ ճաշ տվեք, 10 օրը մեկ ուղարկեք հանգստյան տուն` աբսուրդ բան է»,- ասաց Գ. Սահակյանը:
Մարզերից Երևան եկող հասարակական տրանսպորտի բացակայության խնդրին անդրադառնալով՝ Գ. Սահակյանը նշեց, որ եթե նման բան կա, ապա դա շատ բացասական երևույթ է, և ինքը դատապարտում է այդ երևույթը. «Երբեք չի կարելի ժողովրդին տրանսպորտից զրկել»:
Սահակյանը նշեց, որ ինքը ինֆորմացված չէ, թե կառավարության կողմից որոշում է եղել՝ արգելել մարզերի հասարակական տրանսպորտի մուտքը մայրաքաղաք:
