Ամերիկացի միլիարդատեր և ներդնող Ջորջ Սորոսը պաշտպանում է այն ակցիաները, որոնք սկսվել են Նյու Յորքի գործարար և ֆինանսական կենտրոնում` Ուոլ Սթրիթում, և վերջին օրերին տարածվել են ԱՄՆ մյուս քաղաքներում: Միլիարդատիրոջ խոսքերով` իր համար հասկանալի են հարկատուների դժգոհությունները, որոնց գումարները գնում են ճգնաժամից տուժած բանկերի ֆինանսավորմանը: Այս մասին հաղորդում է RBC-ն:
«Անհրաժեշտ է ոչ թե առանց վերահսկողության գումարներ ներդնել բանկերի բարեկեցությունն ապահովելու համար, այլ քայլ առ քայլ ազատել նրանց վատ ակտիվներից` հնարավորության տալով վաստակել սեփական եկամուտը: Այդպիսով` սեփական ուժերով ճգնաժամից դուրս եկած բանկերը կարող են ապահովել զգալի եկամուտներ և վճարել զգալի հավելավճարներ»,- ասել է միլիարդատերը Նյու Յորքում ՄԱԿ-ի գրասենյակում: Այս մասին հաղորդում է BBC-ն:
Հիշեցնենք, որ հոկտեմբերի 2-ին Նյու Յորքի ոստիկանությունը ձերբակալել է 700 մարդու, երբ նրանք կաթվածահար են արել Բրուքլինի կամրջի աշխատանքը` «օկուպացնելով» այն: Ուոլ սթրիթի «օկուպանտները» առաջ են քաշում տնտեսական և ֆինանսական բարեփոխումներ անցկացնելու պահանջներ: Նրանք նախատեսում են հոկտեմբերի 5-ին ավելի մեծ միջոցառումներ անցկացնել: