Գերմանիայի արտաքին գործերի նախարար Յոհան Վադեֆուլն Իսրայել կատարած այցի ընթացքում հայտնել է, որ Գերմանիան ընդլայնում է օգնությունը Գազայի հատվածի սովահար բնակչությանը: Նա հայտնել է ՄԱԿ-ի Պարենի համաշխարհային ծրագրին լրացուցիչ 5 միլիոն եվրո տրամադրելու մասին։ Այս մասին հաղորդում է Deutsche Welle-ն։
Նախարարը նշել է, որ Բեռլինը լրացուցիչ 5 միլիոն եվրո կհատկացնի Գազայի հատվածում Պարենի համաշխարհային ծրագրին աջակցելու համար, որը կօգնի հացի փռերին և հասարակական սննդի կետերին, որպեսզի Գազայի բնակիչները հացով և տաք սննդով ապահովվեն միջնաժամկետ հեռանկարում։
«Գազայի հատվածում հումանիտար աղետը պետք է անհապաղ դադարի», – ընդգծել է նա հուլիսի 31-ին Իսրայել այցի ընթացքում։
Միևնույն ժամանակ Գերմանիայի արտաքին գործերի նախարարն Իսրայելի կառավարությանը կոչ է արել հնարավորինս շուտ վերսկսել սերտ համագործակցությունը ՄԱԿ-ի և նրա հիմնարկությունների հետ Գազայի հատվածին մարդասիրական օգնություն տրամադրելու հարցում։
Deutsche Welle-ն նշում է, որ Գերմանիան սկսել է Գազայի հատված պարաշյուտներով ինքնաթիռներից հումանիտար օգնության նետումը։ Ըստ ՄԱԿ-ի՝ Գազային հարկավոր է ամսական 62 000 տոննա օգնություն՝ բնակիչների գոյատևման համար։
Գերմանիայի արտաքին գործերի նախարարության տվյալներով՝ 2023 թ. հոկտեմբերին Գազայում պատերազմի սկզբից ի վեր Գերմանիայի կողմից պաղեստինյան տարածքներին տրամադրված մարդասիրական օգնության ծավալը կազմել է ավելի քան 330 միլիոն եվրո։ Այդ գումարի ավելի քան 95%-ն օգտագործվում է Գազայի հատվածի բնակչության համար:
