«Իրավունքի խախտում չէ նստացույցը վրաններում անցկացնելը, իրավունքի խախտում է հասարակական զուգարանների փակումը»,- այսօր «Առաջին լրատվական»-ի հետ զրույցում նման տեսակետ հայտնեց իրավապաշտպան, Արտակ Զեյնալյանը` մեկնաբանելով երեկ ոստիկանության տարածած այն հաղորդագրությունը, թե Ազատության հրապարակում անցկացվող նստացույցը կցրվի ոստիկանության կողմից՝ հասարակական կարգի և մարդկանց սահմանադրական իրավունքի խախտման պարագայում:
Հիշեցնենք, որ արդեն երեք օր է, ինչ ՀԱԿ համակիրները և պարզապես քաղաքացիները խաղաղ նստացույց են անցկացնում Ազատության հրապարակում`պահանջելով երկրում սահմանադրական կարգի հաստատում և արտահերթ նախագահական ընտրությունների անցկացում: «Ոստիկանությունը կարող է ցրել և նստացույցն արգելել միայն այն դեպքում, եթե անհամաչափ գործողություններ կան մասնակիցների կողմից, բայց նստացույցը, որն անցկացվում է հրապարակում լրիվ տեղավորվում է իրավունքի սահմաններում»,- բացատրեց իրավապաշտպանն` ընդգծելով, որ որևէ հիմք չկա այն դադարեցնելու: Նա նաև մեկնաբանեց ոստիկանության այն հայտարարությունները, թե դա անօրինական է, ասելով, որ նստացույցը խաղաղ է և օրինական այնքան ժամանակ, քանի դեռ այն անհամաչափ չէ և չի սահմանափակում այլոց իրավունքները:
Այն հարցին, թե ոստիկանությունն իրավունք ունի՞ խաղաղ նստացույցը ցրելու, Զեյնալյանը պատասխանեց, որ՝ ոչ, իրավունք չունի ցրելու, որովհետև ինչ արվում է խաղաղ է և օրինական: «Իշխանություններն իրավունք չունեին փակել զուգարանները, նույնիսկ պետք է ապահովեին հասարակական զուգարաններով, իսկ տվյալ դեպքում դրանք փակվել են, դա արդեն խաղաղ հավաքի իրականացման իրավունքի սահմանափակում է»,- ասաց իրավապաշտպանը` տեղեկացնելով, որ Սահմանադրությամբ սահմանվում են խաղաղ հավաքների անցկացման և արտահայտվելու ազատության իրավունքները:
