Ադրբեջանական Trend լրատվական գործակալության փոխանցմամբ՝ Nabucco Gas Pipeline International կոնսորցիումն ադրբեջանական «Շահ Դենիզ» գազային հանքավայրի գազի արդյունահանմամբ ու փոխադրմամբ զբաղվող կոնսորցիումին է ներկայացրել իր բազմակողմ առաջարկները։ Այս մասին նշված է ընկերության այսօրվա տարածած հայտարարության մեջ։
Nabucco կոնսորցիումի գործադիր տնօրեն Ռեյնհարդ Միթչեկի հավաստմամբ՝ իրենք վստահ են, որ առաջարկել են «Շահ Դենիզ» հանքավայրի գազի արտահանման լավագույն երթուղին. «Nabucco գազատարի նախագիծը կոմերցիոն տեսանկյունից կենսունակ ու մրցունակ է։ Այն առաջարկում է անպարտելի տարբերակ՝ թե՛ մատակարարների, թե՛ սպառողների համար»։
Հիշեցնենք, որ «Շահ Դենիզ» հանքավայրի գազի արտահանման երթուղիների ներկայացման վերջնաժամկետը լրանում է այսօր։
Օրեր առաջ British Petroleum (BP) ընկերությունն առաջ քաշեց Ադրբեջանը Եվրոպային կապող գազային նոր նախագիծ, որը ստացավ Հարավարևելյան գազատար անվանումը։ BP-ն նախատեսել է կառուցել Nabucco-ի համեմատ ավելի հարմարավետ ու էժան գազատար, որն ունենալու է 1300 կիլոմետր երկարություն և գոյություն ունեցող ենթակառույցների միջոցով «Շահ Դենիզ»-ը կապելու է Թուրքիայի արևմուտքի հետ, որտեղից էլ ադրբեջանական գազը Բուլղարիայով, Ռումինիայով և Հունգարիայով կհասնի Ավստրիա՝ ինչպես որ նախատեսված է Nabucco-ի պարագայում։
Հարավարևելյան գազատարը փորձում է համատեղել քաղաքականության ու բիզնեսի պահանջները, քանի որ շատ գործարարներ կարծում են, որ մոտ 4000 կիլոմետր երկարությամբ Nabucco գազատարը չափազանց քաղաքականացված ու վիթխարի նախագիծ է։ Nabucco գազատարը նախատեսված է ոչ միայն ադրբեջանական գազի, այլև ողջ Կասպյան ավազանի, Իրաքի ու Մերձավոր Արևելքի գազի ներկրման համար։
