Ռուսաստանի Դաշնության նախագահ Վլադիմիր Պուտինն ապրիլի 17-ին Կրեմլում ընդունել է Կատարի էմիր ալ-Թանիին: ՌԻԱ-Նովոստին փոխանցել է հանդիպման բաց մասում կողմերի հայտարարությունների հիմնական դրույթները: Վլադիմիր Պուտինը, մասնավորապես, անդրադարձել է Սիրիայում իրավիճակին և հավաստիացրել, որ Ռուսաստանը «շահագրգռված է, որպեսզի արաբական հանրապետությունը պահպանվի որպես միասնական ինքնիշխան պետություն»:
Իր հերթին Կատարի էմիրը հայտնել է, որ Մոսկվա ուղեւորվելուց առաջ հանդիպել է Սիրիայի անցումային կառավարության ղեկավար ալ-Շարաային, և նա «տրամադրված է շարունակելու Մոսկվայի և Դամասկոսի միջև համագործակցությունը»: Ըստ երևույթին, Պուտին-ալ-Թանի բանակցություններում Սիրիայի և Ռուսաստանի միջև հարաբերությունների թեման առանցքային է կամ հիմնական հարցերից մեկն է:
Այս իմաստով շատ խորհրդանշանական է, որ Կատարի էմիրի Մոսկվա ուղևորությանը զուգահեռ տարածվել է օրեր առաջ ամերիյան հեռուստաընկերություններից մեկին Իսրայելի վարչապետ Նաթանյահուի հարցազրույցի տեսագրությունը, որտեղ նա քննադատել է Կատարի իշխանություններին: Նաթանյահուն պաշտոնական Դոհային հորդորել է կողմնորոշվել՝ «ահաբեկիչների՞ հետ է, թե ահաբեկչության դեմ պայքարողների»: Նաթանյահուն Կատարին մեղադրել է ՀԱՄԱՍ-ին աջակցելու և Իրանի հետ «հակաիսրայելական համագործության» մեջ:
Իսրայելը լրջագույն խնդիրներ ունի նաև Սիրիայում, որտեղ նրա ակնհայտ մրցակիցը Թուրքիան է: Ավելի վաղ իսրայելական մամուլում տեղեկություն է հայտնվել, որ Նաթանյահուն առաջարկել է Սիրիան բաժանել ազդեցության գոտիների: Այդ «ծրագրով» Ռուսաստանը պետք է պահպանի Սիրիայի արևմտյան տարածքներում ռազմական ներկայությունը: Որքանով հասկացվում է, Թուրքիան Իսրայելի «ճանապարհային քարտեզը» չի ընդունում, իսկ ԱՄՆ-ը պատրաստվում էհեռանալ իր «օկուպացիոն գոտուց»:
Սիրիայի անցումային կառավարության ղեկավար ալ-Շարաան Ռուսաստանի հետ համագործակցությունը շարունակելու ի՞նչ սկզբունք է տեսնում՝ մեծ մասով կախված է Թուրքիայից: Նախատեսված է, որ մոտ ապագայում Ռեջեփ Թայիփ Էրդողանը կմեկնի Դամասկոս: Սիրիայի արևելյան շրջաններից ամերիկյան զորախմբի դուրսբերումը Իսրայելում գրեթե տագնապ է հարուցել:
Եթե իրադարձությունները զարգանան այնպես, որ Թուրքիան և Ռուսաստանը Սիրիայում ազդեցության գոտիների հարցում համաձայնության հասնեն, ապա Նաթանյահուի կառավարությունը կհայտնվի չափազանց բարդ իրավիճակում: Սիրիայի ամբողջականության պահպանումը ենթադրում է Գոլանի բարձունքներից և բուֆերային գոտուն հարակից սիրիական տարածքներից իսրայելական զինուժի հեռացում: Իսկ Նաթանյահուն հայտարարել է, որ Իսրայելն «այլևս այդ դիրքերից չի նահանջի»:
Ավելի քան երկու տարի է, ինչ Իսրայելի և Ռուսաստանի միջև բարձր մակարդակի շփումներ չեն արձանագրվել, թեեւ տեղեկություններ կան, որ իսրայելցի պատանդներին ազատ արձակելու հարցում միջնորդություն է իրականացրել նաև Մոսկվան՝ օգտագործելով ՀԱՄԱՍ-ի հետ ավանդական կապերը: Իսրայելում ներքաղաքական իրավիճակը բարդ է, ընդդիմությունը պատրաստվում է խորհրդարանական ընտրությունների:
«Մեր տուն Իսրայել» կուսակցության առաջնորդ Լիբերմանը սոցիալական հարթակում գրառում է կատարել և չի բացառել իր եւ նախկին վարչապետ Բենետի դաշինքը: Վերջինս վարչապետի պաշտոնում բավական վստահելի հարաբերություններ է ունեցել Ռուսաստանի նախագահ Պուտինի հետ: Եթե Կատարի էմիրը Մոսկվա է այցելել Սիրիայի և Ռուսաստանի հարաբերությունների վերականգնման միջնորդական առաքելությամբ, ապա Մերձավոր Արևելքում կարող է ուժերի բոլորովին այլ հարաբերակցություն ստեղծվել, քան ենթադրվում էր Բաշար Ասադի տապալմանը հաջորդած առաջին ամսում:
