ԱՄՆ նախագահ Դոնալդ Թրամփը հայտարարել է, որ ապրիլի 16-ին Ճապոնիայի պատվիրակության հետ մաքսատուրքերի շուրջ բանակցություններում «մեծ առաջընթաց» է ձեռք բերվել։ Այս մասին հաղորդում է Reuters-ը։
Գործակալությունը նշում է, որ ճապոնական կողմը չէր սպասում, որ Թրամփն անձամբ կմասնակցի ամերիկյան մաքսատուրքերի սահմանումից հետո անցկացվող առաջին դեմ առ դեմ բանակցություններին։
Տոկիոն, ըստ Reuters-ի, ակնկալում էր, որ բանակցությունները կառնչվեն միայն առևտրի և ներդրումների հարցերին, սակայն Թրամփն իր մասնակցության մասին հայտարարելիս նշել էր, որ կքննարկվի նաև Ճապոնիայում ԱՄՆ զորքերի տեղակայման ծախսերի հարցը։
«Մեծ պատիվ էր հանդիպում անցկացնել ճապոնական պատվիրակության հետ առևտրի շուրջ։ Մեծ առաջընթաց», – գրել է Թրամփը հանդիպումից հետո իր Truth Social հարթակում՝ առանց այլ մանրամասներ հայտնելու։
Սակայն հակառակ այս հայտարարության՝ Ճապոնիայի տնտեսական վերականգնման հարցերով նախարար Ռյոսեյ Ակաձավան հայտարարել է, որ բանակցությունները հեշտ չեն լինելու, սակայն կողմերը պայմանավորվել են ապրիլի վերջին անցկացնել բանակցությունների երկրորդ փուլը։ Ըստ Ակաձավայի՝ Թրամփն ասել է, որ Ճապոնիայի հետ գործարք կնքելն ԱՄՆ-ի համար «գլխավոր առաջնահերթություն է»։
Ըստ բանակցությունների վերաբերյալ ճապոնական կողմի հաղորդագրության՝ Ռյոսեյ Ակաձավան Սպիտակ տանը նախ 50-րոպեանոց հանդիպում է անցկացրել Դոնալդ Թրամփի հետ, այնուհետև գրեթե 1,5-ժամանոց հանդիպում ֆինանսների նախարար Սքոթ Բեսենթի, առևտրի նախարար Հովարդ Լաթնիկի և առևտրի ներկայացուցիչ Ջեյմիսոն Գրիրի հետ։
Ապրիլի 17-ին Սպիտակ տանը մաքսատուրքերի շուրջ բանակցություններ կանցկացնի Իտալիայի վարչապետ Ջորջա Մելոնին, իսկ հաջորդ շաբաթ Վաշինգտոն է մեկնելու Հարավային Կորեայի ֆինանսների նախարարը։
Թրամփը բազմիցս դժգոհել է ԱՄՆ-ի առևտրի դեֆիցիտից Ճապոնիայի և այլ երկրների հետ։ Նա Ճապոնիայի նկատմամբ սահմանել է 24% ներմուծման մաքսատուրքեր, որոնք, սակայն 90 օրով սառեցրել է, մինչ ընթանում են բանակցություններ։ Այժմ Ճապոնիայի և շատ երկրների նկատմամբ գործում է 10% բազային մաքսատուրք, սակայն մեքենաների ներմուծման 25% մաքսատուրքերն ուժի մեջ են։
