Վրաստանի խորհրդարանը երրորդ և վերջնական ընթերցմամբ հաստատել է 11 օրենքների փոփոխությունները, որոնք նախատեսում են երկրի կառավարությունում նախարարությունների թվի ավելացում։
Այս մասին հայտնում է Sputnik գործակալության վրացական ծառայությունը։
Նշվում է, որ ներկայում Վրաստանի կառավարությունն ունի 12 նախարար և մեկ պետնախարար։ Ընդունված փոփոխությունների համաձայն՝ Տարածաշրջանային զարգացման և ենթակառուցվածքների նախարարությունը բաժանվելու է երկու առանձին գերատեսչությունների՝ ենթակառուցվածքների և տարածքային զարգացման նախարարության։
Գործակալության փոխանցմամբ՝ Ենթակառուցվածքների նախարարությունը կգլխավորի Իրակլի Կարսելաձեն։
Նշվում է, որ Ենթակառուցվածքների նախարարությունը, որը կդառնա գործող նախարարության իրավահաջորդը, պատասխանատվություն է կրելու այնպիսի հարցերի համար, ինչպիսիք են ջրամատակարարումը, գազամատակարարումը, մայրուղիների կառուցումն ու զարգացումը, թափոնների կառավարումը, ինտերնետ հասանելիությունը և այլն։
«Տարածաշրջանային զարգացման նախարարությանը, կգլխավորի Թբիլիսիի նախկին փոխքաղաքապետ Կախա Բեկաուրին։ Նախարարություը զբաղվելու է բարձրլեռնային շրջանների զարգացմամբ, կառավարելու է Տարածաշրջանային զարգացման հիմնադրամը և այլ գործունեությամբ»,-նշված է տարածված հաղորդագրության մեջ։
