Բանակում տեղի ունեցած սպանությունների վերաբերյալ ՄԻՊ գրասենյակի նախաձեռնությամբ ԱԺ-ում կազմակերպված քննարկումից հետո Մարդու իրավունքների պաշտպան Կարեն Անդրեասյանը, պատասխանելով լրագրողների հարցին, թե ինչքանով էր արդյունավետ քննարկումը, նկատեց, որ նման քննարկումները արդյունավետ կլինեն այն ժամանակ, երբ սևազգեստ ծնողներն այլևս տարբեր տեղերում չկանգնեն՝ իրենց բողոքն արտահայտելու:
Անդրեասյանը տեղեկացրեց, որ քննարկումը կոնկրետ արդյունքներ ունի, և ծնողները ՄԻՊ գրասենյակի հետ միասին պատրաստելու են կոնկրետ տեղեկանքներ յուրաքանչյուր գործի վերաբերյալ, ներկայացնելու են բողոքներն ու առկա խնդիրները, իսկ ՄԻՊ-ը այդ փաստաթղթերը փոխանցելու է ԱԺ պատգամավորներին, որից հետո համապատասխան հանձնաժողովները գրություն են ներկայացնելու այն մարմիններին, որոնցից սպանված զինվորների ծնողները դժգոհություն ունեն:
«Ե՛վ սպանված զինվորների ծնողները, և՛ պատգամավորները հստակ արդեն գիտեն մեր հաջորդ անելիքներն ու քայլերը, և այդ իմաստով այս հանդիպումը արդյունավետ էր, բայց դեռ անելիքները առջևում են` սա գործընթացի սկիզբն էր»,- մանրամասնեց մարդու իրավունքների պաշտպանը:
Անդրեասյանը նկատեց, որ այս գործերում խնդիրը ոչ այնքան դատարանների գործունեությունն է, որքան լիարժեք քննությունը: Նա նշեց, որ ծնողները համարում են, որ քննությունը կա՛մ բավարար չափով չի իրականացվել, կա՛մ ընդհանրապես չի իրականացվել. «Մեր խնդիրն է ապահովել նոր քննության սկսում կամ օրենքով սահմանված վերահսկողություն իրականացնել այդ քննության նկատմամբ»:
