Եվրոպական խորհրդարանն օրինական է համարել Պաղեստինի ազգային ինքնավարության կողմից անկախության համար ՄԱԿ դիմելու պահանջը: Այս մասին ասվում է Եվրախորհրդարանի պաշտոնական կայքում տեղադրված հաղորդագրության մեջ: Որոշումը կայացվել է սեպտեմբերի 29-ին խորհրդարանի նիստի ժամանակ: Սակայն բանաձևում միաժամանակ ասվում է, որ Պաղեստինի պետության ստեղծումը հնարավոր է միայն Իսրայելի հետ բանակցությունների միջոցով:
Եվրոպական խորհրդարանի պատգամավորները բանաձևում հավելել են, որ թեև Իսրայելն ունի իր սահմանների անվտանգությունն ապահովելու իրավունք, սակայն Պաղեստինը պետք է հռչակվի 1967 թ. սահմաններով` մինչև Իսրայելի կողմից որոշ տարածքների բռնազավթումը և դրանց վրա շինարարության իրականացումը: Բանաձևով սահմանվում է, որ Երուսաղեմը պետք է դառնա երկու պետությունների մայրաքաղաքը: Խորհրդարանականները կոչ են արել լուծումներ գտնել առաջիկա մեկ տարվա ընթացքում:
Ըստ The Jerusalem Post օրաթերթի` որոշումը կայացվել է միաձայն: Հիշեցնենք, որ սեպտեմբերի 23-ին Պաղեստինի ազգային ինքնավարության ղեկավար Մահմուդ Աբբասը ՄԱԿ-ի կողմից անկախությունը ճանաչելու խնդրանքը ներկայացրել էր սեպտեմբերի 23-ին: Այդ հարցն այս պահին քննարկվում է ՄԱԿ Անվտանգության խորհրդում: Որոշ երկրներ, այդ թվում` ԱՄՆ-ը, փորձում են խոչընդոտել այդ զարգացմանը, քանզի կարծում են, որ անկախության միակողմանի հռչակումը կվնասի արաբա-իսրայելյան խաղաղության գործընթացին:
