Վերջին մեկ տարվա ընթացքում Ռուսաստանում զգալիորեն աճել են դոլարային միլիարդատերերի թիվը և նրանց ընդհանուր կարողությունը։ Երկու ցուցանիշներն էլ հասել են ռեկորդայինի՝ երեքշաբթի՝ ապրիլի 1-ին հրապարակված ամերիկյան Forbes ամսագրի թարմացված ցանկի համաձայն։
Ընդհանուր առմամբ ցուցակում 3028 մարդ կա։ Ամենաշատ ներկայացուցիչներ ԱՄՆ-ից են (902), Չինաստանից (516), Հնդկաստանից (205) և Գերմանիայից (171): Ռուսաստանը դոլարային միլիարդատերերի թվով հինգերորդ տեղում է։
Forbes-ի ռուսալեզու տարբերակը գրում է, որ 2025 թվականին Ռուսաստանում դոլարային միլիարդատերերի թիվը 120-ից հասել է 146 մարդու, նրանց ընդհանուր կարողությունը 625,5 միլիարդ դոլար է։ Նշվում է, որ 20 ամենահարուստ ռուսաստանցիներից 14-ը ենթարկվում են արևմտյան տարբեր պատժամիջոցների։
Forbes-ի վարկածով՝ երկրորդ տարին անընդմեջ ամենահարուստ ռուսաստանցին ճանաչվել է «Լուկօյլի» հիմնադիր Վագիթ Ալեքպերովը՝ 28,7 մլրդ դոլարով: Նրան հաջորդում են «Սևերստալի» և «Նովատեկի» ղեկավարներ Ալեքսեյ Մորդաշովը (28,6 միլիարդ) և Լեոնիդ Միխելսոնը (28,4 միլիարդ) ՝ իրենց ընտանիքներով:
Forbes-ի 2025 թ. ցուցակում կա Ուկրաինայի 7, Ղազախստանի 6 քաղաքացի։ Վրաստանի ամենահարուստ քաղաքացին ղազախական Kaspi բանկի ղեկավար Միխեիլ Լոմթաձեն է (5,9 մլրդ)։ Ցուցակի երկրորդ և վերջին վրացի միլիարդատերը Բիձինա Իվանիշվիլին է, որն ընտանիքի հետ ունի 2,7 միլիարդ դոլար:
Հայաստանի քաղաքացիների մեջ միակ միլիարդատերը Ռուբեն Վարդանյանն է, որ Բաքվի բանտում է։ Իր ընտանիքի հետ նա ունի 1,2 միլիարդ դոլար:
Բալթյան երկրներից միլիարդատերեր ունի միայն Էստոնիան՝ Քրիստո Կյարմանը (2,3 միլիարդ) և Տավետ Հինրիկուսը (1,2 միլիարդ):
