«Ժողովուրդ»-ը գրում է, որ Ավան վարչական շրջանում գտնվող ՀՀ ոստիկանության հոսպիտալում բուժքրոջ սխալ ներարկման պատճառով 4 տարեկան Վալերի Սեյրանյանի մահվանից հետո բուժքույրը ստորագրությամբ բաց է թողնվել:
«Հիշեցնենք, որ սույն թվականի սեպտեմբերի 5-ին չորսամյա երեխան ցավեր էր ունեցել կույր աղիքի հատվածում և սկսել էր փսխել, ինչ պատճառով նրան տեղափոխել էին ոստիկանության հոսպիտալ, որտեղ աշխատում է նրա մայրը: Սակայն մի քանի ժամ անց հարազատներին տեղեկացրել էին, որ երեխան մահացել է»:
Վալերի Սեյրանյանի պապիկը՝ Արամայիս Վերդյանը, կրկին վրդովված զանգահարել է թերթի խմբագրություն. «Բայց էդպես ո՞նց կլինի, ստորագրությունով ազատել են, հիմա էլ փաստաբան ա վարձել, ես զարմանում եմ. փաստը կա, բոլորին հայտնի է, որ մեր էրեխուն սպանել Են, հլը ինչ-որ քննություն են անցկացնում, տենց բան ո՞վ ա լսել, ամբողջ հիվանդանոցը տեսավ որ մեր առողջ էրեխուն տարանք, մեզ դիակ տվեցին»:
Պարոն Վերդյանը ընդգծել է, որ իրենք երեխային հանձնել են բժշկին և ոչ թե բուժքրոջը: Բացի այդ, երեխայի կողքին այլ բժիշկներ են եղել, որոնց մասին ոչ ոք չի խոսում և որևէ անգամ չի շեշտադրվել: «Բա էդ ժամանակ ո՞ւր էր անեսթեզիոլոգը, ինչո՞ւ իր անունը ոչ մի տեղ չի շեշտվում, ինչո՞ւ իրեն ևս չեն տանում ստուգեն, ես ի՞նչ իմանամ՝ ինքն ինչ վիճակում ա եղել, արդյոք ինքը սթա՞փ ա եղել, հիմա էլ ասում են, թե բուժքույր Թամարա Եվդոկիմովնան հիվանդ ա, պետք ա մեղմացուցիչ տան:
Եթե նման բան կա, բա ինքը ո՞նց ա ըտեղ աշխատել ու էն էլ նման պատասխանատու գործ»,֊ասաց պարոն Վերդյանը»,- մեջբերում է թերթը:
