Մեկնարկել է Viva-ի հաջողված կրթական ծրագրի հերթական փուլը
Տասը տարի անընդմեջ Viva-ն ինքնաբացահայտման և զարգացման հնարավորություն է տալիս ուսանողներին՝ կարևոր ներդրում կատարելով նրանց մասնագիտացման և աշխատաշուկայում ինտեգրվելու հարցում: Բուհական դիպլոմն ու որակավորումն անհրաժեշտ, բայց բավարար չեն մասնագիտական ոլորտում աշխատանք գտնելու համար: Տարիների պատասխանատու և ճկուն մոտեցման դրսևորումը՝ «Viva University» ծրագիրը, կարևոր արդյունք է ապահովում երկրի, երիտասարդության ու բիզնեսի համար:
Մեկնարկել է «Viva University»-ի հերթական փուլը: Շուրջ երկամսյա ծրագրի արդյունքում 31 հոգուց կազմված ուսանողների հերթական խումբը պրակտիկ գիտելիքներ և հմտություններ կստանա սպասարկման տարբեր, այդ թվում՝ մարզային կենտրոններում: Ուսանողների այս խումբը ևս հնարավորություն կունենա կարևոր բացահայտումներ անելու գործատու-աշխատող և բիզնես-հաճախորդ շղթաներում ձևավորվող հարաբերությունների մասին, հստակ պատկերացնել՝ ինչ է կորպորատիվ մշակույթը և թե ինչ առանձնահատկություններ, առավելություններ կարող է ունենալ առաջատար ընկերության բիզնես կառավարման մոդելը:
Viva-ի կրթական ծրագրի մասնակիցներին ողջունել է ընկերության գլխավոր տնօրենը՝ հորդորելով ակտիվ և անկաշկանդ մասնակցություն ցուցաբերել:
««Viva University»-ն յուրահատուկ հնարավորություն է կարճ ժամանակահատվածում առավելագույնը ստանալու համար: Երկու ամսում շուրջ քսանհինգ տարվա փորձառության նրբություններին տիրապետելն ամենամեծ ձեռքբերումը կարող է լինել ձեզ համար: Ձգտե՛ք ստանալ ձեր բոլոր հարցերի պատասխանները, լինել ակտիվ և սպունգի նման կլանել արժեքավոր ինֆորմացիան: Եղեք համարձակ, ճկուն, համբերատար և պատասխանատու՝ հաջողության հասնելու համար: Ձեզ տրված է հրաշալի հնարավորություն, փորձեք մասնագիտացման ճանապարհին առավելագույն արդյունք քաղել», – ասել է Viva-ի գլխավոր տնօրեն Արմեն Ավետիսյանը:
Ինտենսիվ դասընթացներն ու սպասարկման կենտրոններում նախատեսվող գործնական շփումները հնարավորություն կտան տիրապետել գործընկերային հաղորդակցման հմտություններին, բացահայտել միջֆունկցիոնալ հարաբերությունների և թիմային աշխատանքի կարևորությունը: Ծրագրի մասնակիցներին կաջակցեն ընկերության՝ տարիների փորձ ունեցող մասնագետները:
«Viva University»-ի հերթական փուլին մասնակցության հայտ ներկայացրած ուսանողներն ընդգրկվել են 7 մարզից (Կոտայք, Արարատ, Արմավիր, Շիրակ, Տավուշ, Լոռի, Արագածոտն) և մայրաքաղաքից: Նրանք ինքնաբացահայտման և զարգացման հնարավորություն կստանան վաճառքի ու բաժանորդների սպասարկման ոլորտներում: Երկամսյա դասընթացներն իրականացվում են Viva-ի բաժանորդների սպասարկման և մարդկային ռեսուրսների վարչությունների համատեղ ջանքերով:
Տասը տարվա կտրվածքով նախագծի շրջանավարտներից 117-ը համալրել են Viva-ի աշխատակիցների շարքերը:
