Եվրոպական մի շարք երկրներ ոչ պաշտոնական բանակցություններ են վարում ՆԱՏՕ-ի և մայրցամաքի պաշտպանության ֆինանսավորման հիմնական պատասխանատվությունը ստանձնելու շուրջ: Այդ մասին հաղորդում է Financial Times-ը՝ վկայակոչելով իր աղբյուրներին:
«Եվրոպայի խոշորագույն ռազմական տերությունները պլաններ են մշակում մայրցամաքի պաշտպանության համար ԱՄՆ-ից ավելի մեծ պատասխանատվություն ստանձնելու համար», – գրում է հրատարակությունը։
Չորս եվրոպացի պաշտոնյաների խոսքով՝ քննարկումներին մասնակցող երկրների թվում են Մեծ Բրիտանիան, Ֆրանսիան, Գերմանիան և Հյուսիսային Եվրոպայի երկրները:
Ըստ թերթի զրուցակիցների՝ այս երկրները մտադիր են «պլան մշակել ֆինանսական և ռազմական բեռը եվրոպական մայրաքաղաքների վրա փոխադրելու վերաբերյալ և այն Միացյալ Նահանգներին ներկայացնել հունիսին Հաագայում կայանալիք ՆԱՏՕ-ի ամենամյա գագաթնաժողովի նախաշեմին»։
Հրապարակման մեջ պարզաբանվում է, որ առաջարկը ներառելու է Եվրոպայում պաշտպանական ծախսերն ավելացնելու և ռազմական կարողությունները հզորացնելու հաստատուն պարտավորություններ։ Երկրները փորձելու են ԱՄՆ նախագահ Դոնալդ Թրամփին համոզել համաձայնել լիազորությունների աստիճանական փոխանցմանը: Ենթադրվում է, որ պլանը նախագծվելու է 5-10 տարվա համար։
Հրատարակությունը նշում է, որ բանակցությունները փորձ են՝ խուսափելու քաոսից, որը կարող է առաջացնել ՆԱՏՕ-ից ԱՄՆ-ի միակողմանի դուրս գալը։
Ամերիկյան նոր վարչակազմը քանիցս հայտարարել է, որ եվրոպացի գործընկերները պետք է ավելի մեծ պատասխանատվություն ստանձնեն Եվրոպայի պաշտպանության համար: Թրամփը բազմիցս քննադատել է ՆԱՏՕ-ի անդամներին պաշտպանության վրա բավարար ծախսեր չկատարելու համար և սպառնացել թուլացնել դաշինքը կամ դուրս գալ դրանից։
